Орман өрті өршімесін
Орман өртін сөндіру оңай шаруа емес. Сондықтан оған жол бермеудің алғы шарттарын қатаң сақтау қажет. Орман өрті жедел өтеді және тез таралады. Қалың ағаш ішіндегі өрт минутына 3-4 метр жылдамдықпен таралып 10-14 сағатта үлкен өртке айналады. Оның ішіне кіру де, өрт сөндіру техникаларын енгізу де қиын шаруа. Орман өрті қатты желді күні тіпті өршіп кетеді. От ағаштардың ұшар бастарынан минутына 5 метрден 100 метрге дейін және одан да көп жылдамдықпен өтеді. Жел жанып жатқан бұтақтарды және ұшқындарды жан-жаққа таратады, олар өрттің жаңа ошақтарын тудырады.
Орман өрттерінің болуының негізгі себептері мыналар:
– сөндірілмеген шылым не сіріңке;
– механизатор орманда өрт қауіпсіздігінің сақтамауы, тұтануға бейім майланған материалды тастап кету, техниканы қолдану қауіпсіздігін бұзу, техника жанында шылым шегу т.б;
– орман ішінде болған саяхатшылар, демалушылар, ауыл шаруашылығының жұмысшылары – кепкен шөп, кесілген ағаш қалдықтары бар жерлерге ашық отты пайдалану;
– орман алқаптарына жақын жерлерде орналасқан егістің орындарын өртеу;
– күннің сәулесі мол түсетін жерлерге шынының сынығын тастап кету,ал ол жандырғыш линза тәрізді күн сәулесінен қуат алып құрғақ шөптерді тұтандырады;
Табиғатты қорғау – баршамызға ортақ міндет! – деп айтылғандай, сұлу табиғатымыздың адамзатқа берері әлі көп. Ормандағы жасыл желектің қиылуына жол бермей, өрттен сақтау – орманшылардың басты міндеттерінің бірі болып табылады. Сондай-ақ, бұл жалпы халықтық іс болып табылады. Ендеше, табиғатымызды өрттен қорғайық!
Жаңакорған ауданының төтенше жағдайлар бөлімі
