Биыл Сыр өңірінің шаруалары егін межесін жоспарлы түйіндеп, қамбаны астыққа толтырды. Әсіресе, бақша дақылдарынан жоғары нәтиже көрсете білді. Жаңақорғандық диқандар да шаруаны ширатып, өнімдерін нарыққа шығарды. Өткен сенбіде облыс орталығында ұйымдастырылған жәрмеңкеге арнайы барған аудан диқандары қала тұрғындарына төмен бағада өнімдерін ұсынды. Күз басталса жәрмеңкенің көркін қыздыратын аудан шаруалары жемісті кәсіптерінің берекесін кіргізуге асығады.  Астана даңғылының бойында Жаңақорған ауданы мен «Байқоңыр ӘКК» АҚ-ның ұйымдастыруымен ауыл шаруашылығы жәрмеңкесін қызылордалықтар асыға күтті. Қыстың қамын жаз ойлаған тұрғындар мейлінше ертерек әрекетке көшуде. Өйткені, қазір базар бағасы сан құбылып, тауар айналымы артып келеді. Халық көп тұтынатын тауарлар, азық-түлік пен жеміс-жидектің бағасы түрлене беруі заңдылық. Биыл Сыр шаруалары 188 500 гектар жерге егін егіп, күріштің әр гектарынан 56,7 центнерден өнім алды. Жарты миллионға жуық ақмаржан өндірді.Жалпы, жаңақорғандық диқандар жәрмеңкеге 35 жүк көлігіне тиелген 130 тоннаға жуық ауыл шаруашылығы өнімдерін ұсынды. Бұл туралы аудандық ауылшаруашылығы бөлімінің басшысы Талғат Зейдалиев:
– Бүгінгі жәрмеңкеге 10 тоннадан астам күріш, 50 тоннадай картоп, 10 тонна сәбіз, 15 тонна пияз, 25 тонна қауын мен қарбыз, 10 тонна асқабақ, 10 тонна жеміс-жидек, көкөніс өнімдері, жарты тонна ет және балық өнімдері жеткізілді. Жалпы биыл өнім шығымы жақсы, межеден шыға алдық. Келер жылға бұдан да жоғары нәтиже алу жоспарлануда. Ең бастысы, су мәселесі тығырыққа тіремесе болғаны. Қалғаны шаруалардың еншісінде, – дейді.Иә, жылда жаңақорғандық шаруалар күз басталса болды, әр апта сайын облыс орталығына жол жүретін еді. Биылғы жылдың бастамасы жаман емес. Айта кететіні, келешекте аудан азаматтары қант қызылшасын өңдейтін шағын цех ашпақ. Аудан әкімі бастаманың барын назарға алып, нақты міндеттер жүктегенін жеткізді. Аймақ басшысына инвестор тарту арқылы қант қызылшасын өңдейтін шағын цехтар ашуды мақсат етіп отырғанын жеткізді. Өз кезегінде Нұрлыбек Мәшбекұлы өзі өсіріп, өзі өңдейтін өңірге қолдау білдіретінін айтты.
Сонымен бүгінгі жәрмеңке де тұрғындар көңілінен шыға білді. Әсіресе, картоп пен асқабаққа көптің көңілі ауды.– Өзім күнделікті тұтынатын тауарларды қаптап алуға тырысудамын. Әсіресе, картоптың бағасы көңілге қонымды. Шыны керек, нарық бағасы жылдан жылға өспесе, түсетін түрі жоқ. Бірақ осындай жәрмеңкелер көбірек өткізіліп тұрса нұр үстіне нұр болар еді, – дейді қала тұрғыны Жамила апамыз.Биыл аймақ басшысының тапсырмасы аясында егіс егуге ынталы ауыл халқына 10-15 гектардан жер дайындалып, нәтижесінде 6802 отбасы 1833 гектарға бақша өнімдерін егіп, жемісін көруде.Биылғы өнімнің бағдарын байқадық, егінші қауымның еткен еңбегін көрдік. Енді келер жылы да осы қарқынын жоғалтпай, диқандар қамбаны астыққа еселеп толтырамыз деген үмітте. Бұған жаңақорғандық ағайынның шамасы жетеді. Оның игілігін Ақмешіт төріндегі жұртшылық та көріп, тілектес болса игі.