Жаңақорған аудандық сотының ұйымдастыруымен аудандық әкімдіктің мәжіліс залында кент тұрғындарымен кездесу өткізілді.

Қазақстан Республикасы Жоғарғы Сотымен жүзеге асырылып жатқан «Сот төрелігінің жеті түйіні» жобасының бірі - Сотсыз татуласу орталығы жобасы болып табылады. Жобаның мақсаты - халық арасында дауды соттан тыс шешу, қоғамдағы қайшылықтарды, дауларды азайту институттарын насихаттау және дамыту алаңдарын құру.
Осы мақсатта аудандық сот төрағасы Н.О.Қосанов, Жаңақорған ауданының әкімі Ғ.М.Әміреевпен бірлесіп, Сотсыз татуласу орталығы жобасын дәріптеу бойынша атқарылатын шаралар жоспарын бекітті.
Аталған жоспарға сәйкес, іс-шараға Жаңақорған аудан әкімінің өкілдері, Жаңақорған аудандық ішкі істер бөлімінің өкілдері, «Нұр Отан» партиясының филиалының төраға орынбасары М.Балқожаев, кәсіпқой және кәсіпқой емес медиаторлар және кент тұрғындары қатысты.
Сот төрағасы Н.Қосанов кездесуге қатысушы кент тұрғындарына  ҚР Жоғарғы Сотымен жүзеге асырылып отырған Сотсыз татуласу орталығы пилоттық жобасының міндеттерін, оның тиімділігін, дауды сотқа дейінгі реттеудің басымдықтары жайлы әңгімеледі.
Жаңақорған аудандық ішкі істер бөлімінің өкілі, «Нұр Отан» партиясының филиалының төраға орынбасары М.Балқожаев, қазақ халқының тарихындағы билер соты мен қазіргі медиацияның  арасындағы ұқсастықтарға тоқталды.
Кент тұрғындары  Жоғарғы Сотпен дауды соттан тыс шешу бағытында жүргізіліп жатқан реформаларды құптайтындарын білдірді.
Жаңақорған аудандық сотының баспасөз қызметі.