ЖАҢАҚОРҒАН АУДАНЫНДАҒЫ ҚҰРЫЛЫС ҚАРҚЫНЫ: 1991-2016 ЖЫЛ

Құрылыс индустриясы – қашанда экономиканың негізгі іргетасы екендігі белгілі. Сондықтан да, құрылыс саласының дамуы елдің экономикалық күш-қуаты мен әлеу-меттік жағдайының артуына тікелей байланысты. Осы сала қарқынды дамыған аймақта жалпы экономиканың барлық бағыттарындағы тірліктің өркен жайып отырғанын аңғаруға болады. Содан болса керек, құрылысты «экономиканың локомотиві» деп атау осы түсінік негізінде қалыптасқан. Осы тұста азаттықтың ақ таңы атқаннан бастап, бүгінгі күнге дейін аудан көлемінде бой көтерген құрылыс нысандарын парақтап шықтық. Тәуелсіздік жылдары салынған қандайда болмасын құрылыс ғимараты, ауданның ажарын айшықтап, сәулетіне сән қосқаны айқын.
Аудандық құрылыс бөлімінен алынған мәліметке сүйене отырып, салынған әлеуметтік нысандардың санына жеке-жеке тоқталсақ. Иә, 1991 жыл. Алаштың айбынын асырып, ата-баба армандаған күнге жеттік. 1992 жылы Жаңақорған кентінде 90 орындық балабақшаның есігі айқара ашылса, Ақсуатта 292 орындық мектеп пайдалануға берілді. Пайымға салсақ, бүгінде сол бүлдіршіндер мен оқушылар орда бұзар отыз жаста. Яғни, ел илігі үшін қызметте. 1993 жылы бірлігі бекем Билібай ауылында 90 орындық білім ордасы бой көтерді. Бұл осы жылы салынған жалғыз нысан. Ал, Тәуелсіздік жылдарындағы 1994 жыл еліміз үшін оңай болмағаны әмбеге аян. Бұл тұста мемлекет ретінде әлемдік картадан орын алып, көк Туды желбіреттік. Елтаңбаны бекітіп, Әнұранды шарықтатып, төл Теңгені тұғырына қондырдық. Әйтсе де, ел ішіндегі қиыншылық әлі де тірлікті шатқаяқтатып тұрды. Бұрынғы жүйедегі кеңшарлар мен ұжымдық бірлестіктер тоз-тозы шығып, жекеменшік ұғымы жайлап ене бастады. Бір жағынан инфляция барыншы шарықтап, қаржылық дағдарыс жағадан алған тұс. Содан болса керек, бұл жылы ауданда мемлекет тарапынан бірде-бір құрылыс нысаны пайдалануға берілмеді. Ал, 1995 жылы Қаратөбе мен Өзгентте қос бірдей білім ошағы ашылып, ұстаздар қауымы мен оқушыларды қуанышқа бөледі. 1997 жылы Машбек Нәлібаев ауылында 150 орындық клубтың лентасы қиылды. Бұл жылы ҚР Президенті Н.Назарбаевтың халыққа жасаған тұңғыш Жолдауы Қазақстанның 2030 жылға дейінгі стратегиясына арналды. Мұнан кейін 2000 жылға дейін әлеуметтік нысан бой көтермеді.
2000-2016 жылдар аралығында 22 мектеп жаңадан салынды. Әрине, тоқсаныншы жылдардағы тоқырауда асар әдісімен салынған білім ордасы да болады. Алайда мемлекет қалыптасу жолына түскеннен кейін типтік үлгідегі заманауи мектептер бой көтере бастады. Жалпы, мәліметті түйіндеп айтсақ, 1992-2016 жылдар аралығындағы 26 мектеп, 13 балабақша, 7 ауылдық клуб, 21 дәрігерлік емхана, ФАП, медициналық пунктер ашылған. Сәтін салса, Тәуелсіздіктің 25 жылдық мерекесі қарсаңында кент орталығында жаңа емхана пайдалануға беріледі.Ауысымына 250 адам қабылдайтын емхана құрылысын «Бақ-Жай» ЖШС-гі жүргізуде. Осы орайда, айта кету керек, Елбасы Жарлығымен қабылданған мемлекеттік «100 мектеп, 100 аурухана», «Балапан», «Қолжетімді баспана – 2020», «Өңірлерді дамыту – 2020» бағдарламасының қосқан үлесі орасан.
Аудандық құрылыс бөлімінің басшысы Қалмақан Тәжіқұловтың айтуынша, тәуелсіздік жылдары ауданда 240 тұрғын үй салынған. Әсіресе, 2003 жылы 61 тұрғын үй иесін тапса, 2005 жылы 87 үйге жас мамандар қоныстанды. Осы жылдар аралығында «Түгіскенде» 31 үй бой көтерді. 2005 жылы Төменарықта 35 үйдің иесі қуанышқа кенелген. Сондай-ақ Жаңақорған ауданы жол мәселесін шешкен ауданның бірі. Тәуелсіздік алғалы 165,65 шақырым жол қайта жаңғыртылып, асфальт төселген.
Иә, ауқымы үлкен саланы серпінді дамытуға қазіргі заманға сай білікті де білімді, іскер де құрыш білекті құрылысшылардың еңбегі зор. Заман талабына сай заманауи үлгілермен салынған әлеуметтік нысандар аймағымыздың айбынын арттырып, сымбатына сән қосатыны айқын. Оған қоса, құрылыс кешені ел экономикасына, оның ішінде тұрғындардың әлеуметтік әлеуетінің артуына шешуші ықпал ететіні сөзсіз.
Самат ОҢҒАРҰЛЫ