Саз әлеміндегі жарық жұлдыздың 70жылдық мерейтойы

Сыр бойы, оны ішінде әнге , жырға құмар Жаңақорған өңірі танымал дара тұлғалардан кенде емес. Соның бірі – Республикаға еңбегі сіңген мәдениет қызметкері композитор Бексұлтан Байкенжеев. Болмысы дара тұлғаның туғанына 70 жыл толуына орай Манап ауылында аудандық байқау ұйымдастырылып, сазгердің ұлы Әбсұлтан Байкенжеев төрағалық жасады.

«Құлақтан кіріп бойды алар,

Жақсы ән мен тәтті күй.

Көңілге түрлі ой салар,

Әнді сүйсең менше сүй» - деп ұлы Абай атамыз ән мен жырдың құдыреттілігін қалай бейнелеген десеңізші. Сырдың топырағы мен шөңге, тікенегіне аяғын тілгілеп өскен Бексұлтан ән мен жырды Абай атасынан кем сүйген емес. Содан болар ол 450-ге жуық ән жазса, оның 80-нен астамы бұл күндері кең байтақ егеменді еліміздің ауыл кештерінде болсын сахна төрінде болсын асқақ сезіммен орындалып келеді. Осы игі дәстүр бүгін де Манап ауылында  жалғасын тапты.

"Ақбаян", "Ақ гүлім", "Ақ шолпан" әндерімен бүкіл Қазақстанға танылған Бексұлтан Байкенжеевтың туылғанына 70 жыл толуына орай "Сағынтып кеткен сырлы әуен" атты сазгердің әндерінен аудандық жас әншілер байқауы өтті. 14-29 жас аралығында өткен байқауда Бесарық, Қожакент, Түгіскен, Кеңес, Манап, Машбек, Қосүйеңкі, Қандөз, Келінтөбе ауылдарынан 9-дан аса өнерпаз қатысып, бақтарын сынады. Нәтижесінде Бас жүлдені машбектік Әзиза Әбілбашар, Жүлеедлі бірінші орынды манаптық Ислам Нағызхан, екінші орын Салтанат Тоқашқа бұйырса, байқау қорытындысы бойынша үздік үштікті келінтөбелік Нұрайна Бекмұрат пен бесарықтық Тұрғанай Белгібаева өзара бөлісті.

Толығырақ газеттің алдағы санынан оқи аласыздар.

Лаура БИБАСАРОВА