Құлақтан үнің кетпестей, сыңғырла соңғы қоңырау!
Бүгін міне, тағы бір оқу жылы аяқталып, соңғы қоңырау үні де сыңғырлады. Осындай салтанаты шара аудан орталығындағы №3 мектеп-интернат алаңында «Сыңғырла, күміс қоңырау» тақырыбымен кең көлемде ұйымдастырылды.
Шараға сай етіп безендірілген мектеп алдында ұстаз, мектеп жайлы әндер үздіксіз шырқалып тұрды. Мектеп бітіруші 24 түлекті шығарып салуға ата-аналары, мұғалімдер, 1-10 сынып оқушылары және арнайы шақырумен келген қонақтар қатысты. Дәстүр бойынша, әуелі Қазақстан Республикасының Мемлекеттік Туы енгізіліп, Әнұран орындалды. Салтанатты рәсімнен кейін сөз алған мектеп директоры Ләззат Машбекқызы Нәлібаева: – Бітіруші түлектер тарыдай болып кіріп, таудай болып шыққан алтын ұя мектептен үлкен өмірге қадам басқалы тұрсыңдар. Алдағы сынақта жақсы көрсеткішке қол жеткізіп, еліміздің білікті мамандары атануларына және түрлі жетістіктерге жетіп, таңдаған мамандықтарыңыздың дамуына өз үлестеріңізді қосуға шын жүректен тілектеспін. Еліміздің білікті де білімді маман иесі болыңыздар, – деді.
Құттықтау сөзден кейін мектеп басшысы 2018-2019 оқу жылында Халықаралық, Республикалық сайыстардан жеңімпаз атанған мектеп оқушыларын марапаттады. Сонымен қатар, Ләззат Машбекқызына да еңбек жолында көрсеткен озық қызметі үшін аудандық балалармен мәдени-тәрбиелік жұмыстар орталығының «Алғыс хаты» және Қорқыт ата атындағы Мемлекеттік университеті атынан Балдана Қайратқызындай шәкірт тәрбиелегені үшін «Алғыс хатымен» мадақталды.
Сонымен қатар, осыдан тура он жыл бұрын бітірген түлектер ортаға шығып құрметпен ұстаздарына бас иіп, ұстазы Роза Саулебековаға, мектеп ұжымына алғыстарын айтып, Қызылорда облысының білім басқармасының басшысы М. Мелдебекованың «Алғыс хатын» мектеп ұжымына табыс етті.Бұдан кейін сөз кезегін мектептің ата-аналар ұйымының төрайымы Әдемі Дәрібаева алды. Ол өз сөзінде: Мектеп басшысына, ұстаздар қауымына, ата-аналарға ризашылығын білдіріп, бітіруші түлектерге тек қана сәттілік тіледі.
Әсем ән мен мектеп вальсіне ұласқан кеште 11 сынып оқушылары мектеп табалдырығын енде ататаған оқушыларға сый-сиапаттарын табыстаумен қатар, 10 сынып оқушыларына аманат хатын табыстады.
Ендігі кезек түлектердің ата-аналарына деген жүрек тебірентер ыстық ықыласы мен алғысы өлең түрінде жеткізіліп,жиналған қауымды бір жылатса артынша флешмоб орындалып көңіл-күйді бір серпілтті.
Ортаға бітіруші түлектер Нұржан Сарбасовтың әжесі мен Мейрамбек Ілесбайдың атасы шығып ақ жол тілесе, құдайы қонақ Бәкір Жұмабеков ақ батасын берді. Сонымен қатар мектептің ардагер ұстазы Гүлнар Айтілеу телефон арқылы Алматы қаласынан арнайы сәлемдемесін жолдады.
Осылайша әсерлі өткен соңғы қоңырау кеші 11 сынып оқушыларының әрқашан бейбітшілік заман, аспанымыз ашық болсын деген ниетпен көгершін бейнесіндегі әуе шарын ұшыруына ұласты.
Одан әрі салтанатты шараның соңғы қоңырау соғу рәсіміне кезек беріліп, қоңырау соққан «Алтын белгі» үміткерлері Аружан Әбдіғаппар мен Бекзат Әріпбек 1сыныптың үздік оқушысы Раяна Талғатқызымен алаңды айнала жүріп өтті. Бұл мектеп бітірушілер үшін қоңыраудың соңғы сылдыры болғанымен балалық шақтан болашаққа қадам басқандағы алғашқы дыбыс еді. Шара соңы түлектердің дөңгелене төгілтіп билеген мектеп вальсіне ұласып, жиналған көпшілік құрметпен мектеп алаңынан шығарып салды.Иә, он бір жыл білім беріп, тәрбиелеген алтын ұя мектеппен, аяулы ұстаздарымен қимай қоштасқан түлектер үлкен өмірге осылайша қадам басты. Оларды алда талай сынақтар күтіп тұр. Сол сындардан сүрінбей өтсін деген тілектермен соңғы қоңырау салтанаты да өз мәресіне жетті.
ЛАУРА БИБАСАРОВА
