ӨНІМДІЛІККЕ БАСТАҒАН ЖАҢА БЕТБҰРЫС

Айқын көрінісі, былтыр сыр диқандары Тәуелсіз Қазақстанның күріш өсіру тарихындағы ең жоғарғы рекордтық көрсеткішке қол жеткізді.Мұндай жетістікке жетуге жаңақорғандық диқандардың үлесі қомақты. Бұл жөнінде аудан әкімі Ғалым Әміреев есепті кездесу барысында баяндады.
– 2017 жылдың басты табысы ауылшаруашылығы саласында байқалды. Яғни, инвесторларды тарту арқылы біршама жылдардан бері істен шығып қалған көптеген егіс танаптарын іске қосуға мүмкіндік жасалды. Оның үстіне, өнімділігі жоғары күріштің тұқымын аудандастырып, агротехникалық жұмыстар қолға алынудың арқасында мол өнім жинадық. Былтырғы жылдың күріш егісіне себілген 2100 тонна күріш тұқымының 1216 тоннасы «Маржан», 611 тоннасы «Лидер», 139 тоннасы «Фаворит», 46,5 тоннасы «Лазур, 86,0 тоннасы «Искандер» сорттары себілді. Ауданда егілген 9967 гектар күріш дақылының 4415 гектарына немесе 45 пайызына жаңа сорттар егілді – деді аудан басшысы.