Талдықорғанда тағы бір адам менингококк инфекциясын жұқтырды деген күдікпен ауруханаға түсті. Қазір 9 жастағы бала облыстық балалар ауруханасында жатыр, деп хабарлайды Baq.kz ақпарат агенттігі.

Алматы облысындағы қоғамдық денсаулық сақтау департаментінің басшысы Ерғали Сыдымановтың айтуынша, науқастың жағдайы қалыпты.

«9 жасар бала қазір балалар ауруханасында жатыр. Ол Ораза ұстап жүрген екен. Оның үстіне мешітте медреседе оқиды. Соңғы барған жері сол жер», - деді департамент басшысы Ерғали Сыдыманов.

Естеріңізде болса, бұған дейін Талдықорған қаласында менингококк инфекциясын жұқтырды деген күдікпен 2 адамның ауруханаға түскені туралы хабарлаған болатынбыз. Бұл екі науқасқа да клиникалық тұрғыда аталған диагноз қойылған. Ал бүгін ҚР Денсаулық сақтау министрлігі жыл басынан бері қанша адам менингококк инфекциясын жұқтырғаны туралы айтқан болатын.