Жәрмеңкеде ризық мол
Өткен сенбіде жаңақорғандық диқандардың кезекті жәрмеңкесі ұйымдастырылды. Әдеттегідей «Prime park» саябағының алдында қаз-қатар тізілген көліктер аудан халқына азық-түлік өнімдерін қолжетімді бағада ұсынуды мақсат етті. Бұл жолы да аудандағы 14 ауылдық окруктен әкелінген өнімдер мен облыстық «Байқоңыр» әлеуметтік тұрақтандыру қорынан жеткізілген сапалы өнімдер нарықтан төмен бағада тұтынушыларға ұсынылды.
Ауылдан келген өнімдерге деген сұраныс расында өте жоғары. Әсіресе, ақ күріш, картоп пен пиязды алушылардың қатары көп. Жаңарықтық шаруа Хамат апай да жәрмеңкеде төбе көрсетті. Күріштен бөлек, қауын мен қарбыз егіп, кәсібін дөңгелетіп отырған шаруа биыл да егіс көлемін кеңейтіп, жақсы нәтижеге қол жеткізуді көздеп отыр. Сондай-ақ сөк пен талқанның да саудасы қызды. Ораза айында ең өтімді өнім болған соң бұл өнімдердің тұтынушылары көбейді. Тұрғындар да дән разы, осылай жәрмеңке жиі өткізілуі тиіс деп ұсыныстарын жеткізді.
Айта кететіні, мұндай жәрмеңке облыс орталығында да ұйымдастырылды. Диқан қауым қала тұрғындарына жылқы, сиыр, қой етін тауар өндірушілердің бағасымен ұсынды. Атап айтқанда, сиыр еті 2400 теңгеден, жылқы еті 2300-2700 теңге аралығында сатылды. Сонымен қатар 2 тоннаға жуық картоп, 3 тонна көкөніс, 2 тонна бақша, 3 тонна ет пен 4 тонна балық, 1 тонна сүт өнімдері, 2 тонна күріш және тағы басқа да өнімдер нарықтан төмен бағада ұсынылды.
Әли ТЕМІРБЕК
