Қазақстанда бизнесті қолдау шаралары қайта қаралды
Президент жолдауын іске асыру мақсатында үкімет бизнесті қолдау шараларын қайта қарады. Кәсіпкерлерге облигациялық қарыздар беру шарттары едәуір кеңейтілді,Үкімет "Бизнестің жол картасы" және "Қарапайым заттар экономикасы" бағдарламаларын біріктіріп, шағын және орта кәсіпкерлікті қолдауға арналған жаңа кешенді бағдарлама қабылдады. Жаңа бағдарлама аясында субсидиялау шарттары өзгертіліп, кепілдік беру құралы кеңейтілді, сондай-ақ облигациялық қарыздар беру шарттары жеңілдетілді.
Биылғы 6 айда жаңартылған бағдарлама бойынша шамамен 14 мың бизнес жобасы қолдау шараларымен қамтылды, ал жақын арада өндірістің технологиялық күрделілігіне қарай мемлекеттік қолдаудың сараланған тетіктерін енгізу жоспарлануда.
Мемлекет басшысының "Әділетті Қазақстанның экономикалық бағдары" атты Қазақстан халқына Жолдауында қойған тапсырмасын орындау мақсатында үкімет "Бизнестің жол картасы" және "Қарапайым заттар экономикасы" бағдарламаларын біріктірген шағын және орта кәсіпкерлікті қолдау мен дамытуға арналған кешенді бағдарламаны әзірлеп, қабылдады.
"Кәсіпкерлікті дамыту саласында мемлекет жүргізіп отырған саясаттың қазіргі күн тәртібі мен мықты, бәсекеге қабілетті кәсіпорындар құру қажеттігін ескере отырып, жаңа бағдарлама аясында тиімді жобаларға қолдау көрсету көзделген. Сонымен қатар жаңа жобаларды субсидиялау үшін бюджетті бөлу негізінен өңдеу өнеркәсібі саласындағы (шамамен 50 пайыз) кәсіпорындар арасында жүзеге асырылады. Сондай-ақ бюджетке түсетін жүктемені азайту үшін қызмет көрсету саласындағы жобаларды субсидиялау мерзімі 5 жылдан 3 жылға дейін қысқартылды. ШОБ жобаларын субсидиялаудың сараланған әдісі қарастырылған, бұл кезең-кезеңімен нарықтық жағдайларға көшіруді көздейді", - делінген хабарламада.
Жаңа бағдарлама бойынша субсидиялауға жататын жекелеген қызмет салалары оңтайландырылды. Несиелер бойынша кепілдік беру құралы кеңейтілді, атап айтқанда, кепілдіктер сомалары ұлғайтылды, бизнес субъектілеріне 1 млрд теңгеден асатын несие сомаларына нарықтық шарттар бойынша кепілдік алу мүмкіндігі берілді. Бұған қоса, бағдарламада мемлекеттік қолдаудың баламалы құралы ретінде синдикатталған несиелеу қарастырылған, ол бір мезгілде бірнеше банк арқылы 15 млрд теңгеге дейін ірі жобаларды қаржыландыруды көздейді.
Сондай-ақ облигациялық қарыздар беру шарттары едәуір кеңейтілді. Мәселен, эмитент-кәсіпкер облигация шығару кезінде купондық сыйақы мөлшерлемесіне субсидия алып, 5 жыл мерзімге дейін 6 пайыз мөлшерлемемен 5 млрд теңгеге дейін қаржыландыруды тарта алады. Биылғы 6 айда жаңартылған бағдарлама аясында субсидиялар мен кепілдіктер түріндегі қолдау шараларымен Қазақстанда шамамен 14 мың бизнес жобасы қамтылды: субсидиялау бойынша – 566 млрд теңгеге 8 624 жоба, кепілдік беру бойынша – 178,9 млрд теңгеге 5 381 жоба. Жақын арада өндірістің технологиялық күрделілігіне қарай мемлекеттік қолдаудың сараланған тетіктерін енгізу жоспарлануда. Жоғары технологиялық дайын өнім шығаратын кәсіпкерлер үшін қолдау шаралары ұзақ мерзімге арзандатылған несие беруді қамтиды. Аталған тетіктер бизнесті мақсатты әрі тиімді қолдауды қамтамасыз етуге мүмкіндік береді, бұл, өз кезегінде, тұрақты экономикалық өсімге және еліміздің бәсекеге қабілеттілігін арттыруға ықпал етеді.
