Сақтансаң сақтайды
Суға түсу маусымының нағыз қызған шағы. Шілде айы, аптап ыстықта әсіресе ойын балаларының көл жағалап, одан қала дария төңірегін торуылдайтыны рас. Алайда, жыл сайын соның салдарынан адам қазасы орын алып жататыны жанымызға батады. Осындай қайғылы оқиғалардың алдын алу мақсатында «AMANAT» партиясы аудандық филиалының төрағасы А.Мажитов жергілікті тиісті бөлім мамандарымен бірге «Таза Қазақстан» партиялық жобасы аясында су айдынына мониторинг жұмыстарын жүргізді. Мониторинг барысында су айдынына шомылуға келген балаларды қауіпсіздік шараларымен таныстырып, түсіндірме жүргізді.«AMANAT» партиясының аудандық филиалының төрағасы Арман Әбілпейсұлы тұрғындарды қауіпсіздік шараларын сақтауға үндеді.
– Су – мәңгілік қуаттың қайнары ғана емес, тілсіз жаудың бірі. Сондықтан, суға түскенде сақтық шараларын қолданбаса аяғы қайғылы оқиғалармен аяқталып жатады. Қазіргі таңда жасөспірімдермен қатар ересектердің де суға кетуі жиілеп кетті. Сондықтан да, ел арасында үгіт-насихат жұмыстары көбейсе, қауіп азаяры сөзсіз. Көпшілікпен жұмыс жасауды күшейту керек. Бұл тұста ата-аналарға артылар міндет ауыр. Осындай қайғылы жағдайлардың алдын алу үшін, ата-аналардың жазғы демалыс уақытында балаларын әрдайым бақылауда ұстауға, азаматтардың белгіленбеген орындарға суға түспеуге шақырамыз, – дейді.
Апат айтып келмейді, сондықтан қандай жағдай болмасын сақ болған абзалырақ. Қазақта бір сөз бар ғой «сақтансаң сақтайды»...
