Құрметке лайық жан
Журналистер күніне орай Қызылорда қаласындағы «Өнер орталығында» қаламгер қауымның құрметіне орай «Қанатты қалам» мерекелік кеші болып өтті. Шығармашылық өкілдерінің еңбегін бағалап, мерейін үстем еткен салтанатты жиында «Жаңақорған тынысы» газетінің бас редакторы Баян Үсейінова апайымыз ҚР Мәдениет және ақпарат министрінің «Ақпарат саласының үздігі» медалімен марапатталды.
Біздің рухани кемеңгеріміз әрі ұстазымыз Баян Әлеудинқызы 30 жылдан аса ауданның төл басылымында қызмет атқарып, қазақ журналистикасының дамуына елеулі үлес қосып келеді. Әсіресе, әйел жанының ішкі сырына терең бойлап, қазақтың аяулы аналары мен біртуар қыздарының, ибалы келіндері мен қылықты қыздарының келбетін шығармаға арқау еткен, нағыз сара сөзден інжу терген қаламы қуатты қаламгер. Бізде апайымыздың ізінен еріп, тәрбиесінен тәлім алып келеміз. Сондықтан да, бұл марапатқа барлығымыз да риясыз қуанып, шынайы тілектестік білдіреміз.
