» » Тайғанақ уәдені табиғат көтермейді

Тайғанақ уәдені табиғат көтермейді

Бүгінгі күндері ел өңірінде болып жатқан қарқын су қияметі бізге осы тәмсілді дәлелдеп беріп отыр. Үйреншікті дағдылары бойынша барлық төтенше жағдайға дайындық мықты деп қойып құдайына аманаттап алаңсыз жүргендер нақты күн туғанда тығырықтан шығудың көзін таба алмай, соның тауқыметін қарапайым халық бастан кешіп отыр. Қарғын суға қарқ болып, мал-құсы суға кетіп, қу жаны әупірімдеп аман қалғандардың алда әлі қанша тарығары белгісіз.
Бейбіт күнде берекесі қашқан елдің осындай күйді бастан кешкен жағдайларына Мемлекет басшысы жан күйзелісін білдіріп, қвлың халықтан кешірім сұрады. Биліктің барлық буынында басшылықтың сенген адамдары міндетін адал атқвра білмеген жағдайдың түбі қайырлы болмайтынынң бұл бір анық мысалын көрсетіп отыр.
Биыл табиғат ылғал жағынан тарықтырмады.Қар да, жаңбыр да емен-семен мол жауды. Осы табиғи ресурсты тиімді жағына бұруға бағытталған технологиядан да, қаржы-қаражаттан да тапшылық көрер жайымыз жоқ. Тек оны іске қосатын сана интеллектісінің икемсіздігінен қысымен жиылған қарғын су иен далаға жайылып, жолындағыны жайпап өтіп, мал мен жанға орасан зор шығын әкелді.
Елдегі төтенше жағдайға орай шұғыл жиын өткізген Президент Қасым-Жомарт Тоқаевтың су тасқынының алдын алуда шешімді әрекет жасай алмаған тиісті тұлғалардың атына ауыр сын айтып, қатаң сөгіс арқалатуының астарында осындай ащы ақиқат жатыр.

Баян Үсейінова

31 наурыз 2024 ж. 240 0