Қазақ әйелі – елдіктің, биіктіктің өлшемі һәм белгісі. 8 наурыз – Халықаралық әйелдер мерекесіне орай «AMANAT» партиясы Жаңақорған аудандық филиалында “Бақытты отбасы” партиялық жобасы аясында «Адамзаттың асылы – Ана деген құдірет» атты аналармен кездесу өтті. Шараға арнайы ауданымызда әр саланың қадірлі қыз-келіншектер мен ақ жаулықты аналарды шақырылып, құрмет көрсетілді. Аудандық партия филиалының төрағасы Арман Мажитов алғы сөз алып, нәзік жан иелеріне ыстық лебізін білдірді.
– Құрметті аналар! Сіздер ұлт тірегісіздер. Бақыт балалы үйге қонады дегендей, сіздер бақыттысыздар, әрі батырсыздар. Баланы өмірге әкеліп, оларды өсіріп, білім беріп, қоғам игілігіне пайдасын тигізетіндей етіп тәрбиелеу аналардың қажырлы еңбегінің, нағыз ерлігінің белгісі. Соған қарамастан сіздер жұмысты да, үй тірлігін де, бала тәрбиесін де қатар алып жүрсіздер. Осындай еңбекқор аяулы жандарды марапаттап құттықтау – біздің айнымас дәстүрімізге айналған. Әрқайсыңыздың жанұяңызға ырыс-ынтымақ тілеймін. Қазақ әйелдері отбасының ұйытқысы ғана емес, олар қоғамды алға сүйреп, бірлік-берекені бекемдейтін қуатты, қозғаушы күш. Жаңақорғандық аналар халық санының өсіміне оң әсерін тигізіп, ұрпағына тәлімді тәрбие, саналы білім беріп келеді. Сондай-ақ, саясатта да, бизнесте де, қоғамдық жұмыста да белсенді, – деп алғаусыз ақ тілегін жеткізді.
Мерекелі күнде мейірлі шуағы артып, қасиетті Жер-Анамен бірге бар адамның тұла бойына нәр құятын көктем мерекесіне орай арнайы «Алғыс хатпен» және сый-сыйапат табысталды. Жиын соңында аналар алғыстарын білдіріп, ыстық лебіздерін жеткізді.