Қазіргі таңда заман талабына сай білім мен ғылымның қарыштап дамыған кезеңінде әр баланың бәсекеге қабілетті болып, жан-жақты дамуы өте маңызды. Мемлекет басшысы Қасым-Жомарт Кемелұлы Тоқаевтың Ұлттық қоғамдық сенім кеңесінде берген тапсырмасына сәйкес "Оқуға құштар мектеп" жобасы аясында "Әр бала - болашақ данышпан" ұстанымын қолдайтын "DANYSHPAN" оқу-әдістемелік академиясы мен Жаңақорған ауданының қоғамдық даму бөлімінің "Жастар ресурстық орталығы" КММ-нің ұйымдастыруымен "Тұлғалыққа бір қадам" атты кітап оқу бәйгесі бастау алды. Жобаға аудандық білім бөлімі мен Жаңарған Жаңақорған Жастары қоғамдық қоры қолдау көрсетуде.
Бәйгенің мақсаты мектеп оқушыларын кітап оқуға деген құштарлығын оятып, кітап оқу дағдысын қалыптастырып, әрі жандандырып, сол арқылы төл құндылықтарымызды насихаттау болып табылады.
Сайысқа Жаңақорған кенті мектептерінің 3-11 сыныптың 300-ге жуық оқушылары қатысуда. Оқушылар 4 ай мерзімде 4 кітап оқып, мән мағынасына үңіліп, өзара талқылау арқылы үздіктер әр ай сайын анықталып отыратын болады. Бүгін бәйгеге қатысушы оқушылар арасында "Финляндия ақ лала гүлдер мекені" кітабы бойынша флешбук жиыны өткізілді. Оқушылар өзара жарысқа түсіп, үздік болып танылған С.Сапарбеков атындағы #125 мектеп оқушылары 30000 тг құрайтын қаржылай сертификатпен марапатталды.