Отбасы таланттары
Жақында кент орталығындағы №163 орта мектепте отбасылық құндылықтарды дәріптеу мақсатында «Отбасы таланттары» тақырыбында іс шара өтті. Бұл бастаманы 3 «д» сынып жетекшісі Мадиева Мөлдір ұйымдастырып, ата-аналармен керемет байланыс орнатты.
Игі шараның негізгі мақсаты – өскелең ұрпақтың бойында отбасы құндылығы туралы түсініктерді қалыптастыру, оны сүйе білуге, отбасы игілігі үшін талмай еңбек етуге, отбасы тәрбиесінің мән-маңызын ашып көрсете отырып, ұлттық салт-дәстүрді түсініп, құрметтеуге баулу, алдағы өмірге даярлау. Үлкенді үлгі, кішіні мақтан етуге, жанұяның мақтанышы болуға тәрбиелеуде кештің тәлімі мол. Бұл шараның негізгі ерекшелігі, қатысушылар бір-бірімен сайыс бәсекесінде бақ сынасты.
Өзара тартысты өткен сайыста әрбір қатысушы командасы үшін барын салды. Қай отбасының бірлігі бекем, ырысы тасқан, мерейі асқаны да жарыс барысында белгілі болды. Тағылымды шарада отбасы мүшелерінің спорттық өнерімен бірге бала тәрбиелеудегі біліктілігі де бағаланды. «Балаларымыз сахнаға шыңдалып, өнерге бейімделіп, отбасылық жылылықты жастайынан сезініп өссе дейміз” деген ниеттегі ата-аналар аз емес екен. Сайысқа сыныптың 18 ата-анасы қатысып, үш топқа бөлініп, өз өнерін көрсетті.
Сайысты қорытындылаған мектеп директорының тәрбие ісі жөніндегі орынбасары Айгүл Назарымбетова, мектеп директорының оқу ісі жөніндегі орынбасары Шоманова Зияда, бастауыш бірлестік жетекшісі Қарлығаш Оразгелдиева ата-аналарға алғысын айтып, сый-сияпатпен марапаттады.
Әсел РЗАЕВА
