Құрметке лайық қалаулы
«Өнер алды – қызыл тіл» деп сөз өнеріне, сөйлеу шеберлігіне үлкен мән берген біздің халқымыз ақын-жыршыларын қадір құтып, ерекше дәріптеп отырған. Осындай дәстүр тағылымына аудан әкімі Руслан Рүстемов пен ақиық ақын Әбілқайыр Сыздықов арасында еркін форматта өрбіген кездесуде куә болдық.
– Тәуелсіздік күні қарсаңында қазақ халқының рухани өмірінде алтын әріптермен жазылатын сәттердің куәсі болдық. Сыр өңірі, оның ішінде Жаңақорған ауданының тарихында ең бір үкілі, ең бір айшықты күн ретінде бағаланатыны анық. Бұл – классик жазушы Тынымбай Нұрмағамбетовтің Абай атындағы Мемлекеттік сыйлықтың лауреаты атануы және Сыр сүлейі Мұхтар Ниязов үшінші рет «Алтын домбыраны» қанжығасына байлады. Ал ақиық ақын Әбілқайыр Сыздықов мәдениет саласының ең мәртебелі марапаты «Мәдениет саласының үздігі» төсбелгісін кеудесіне тақты. Оған қоса, Жаңақорған ауданының «Құрметті азаматы» атанды.
Шабытыңыз шарықтап, ұлттың рухани-мәдени көкжиегін арттыруға үлес қоса беріңіз, – деп құттықтады Руслан Рүстемұлы.
Расында әдебиет, мәдениет, өнер саласында ерекше тарихи сәт орын алды. Жазушы Тынымбай Нұрмағамбетовтің, қызылордалық ақындар Мұхтар Ниязов, Серік Ыдырысов, Әбілқайыр Сыздықовтың жетістігі барша алаш жұртын қуанышқа кеңелтті. Өйткені бәрі де марапатқа лайық, өрісі кең, тұғыры биік тұлғалар.
Әкім мен ақын сыйлас, сырлас достар болғандықтан кездесуде ерекше жылылық байқалды. Ашық-жарқын әңгімеге ұласып, өрелі ой қозғалды.
– Еңбек еленіп жатқанда адамның мерейі тасып, марқайып қалады екен. Бұл марапаттардың өзіндік салмағы, жауапкершілік жүгі бар. Сондықтан мемлекеттік мүдде жолында үлес қоса беремін, – деп толғанысын жеткізді Әбілқайыр Әбілпаттаұлы.
– Ақын Әбілқайыр Сыздықов елге арқалы ақын ретінде сыйлы, ал ауданымыз үшін бұрыннан құрметті азамат. Тек комиссия мен мәслихат заңды түрде бекітіп берді.
Ең бастысы, елде саяси тұрақтылық болса, ақын-жазушылардың жырлайтын, жазатын тақырыбы ортаймайды. Сондықтан елдік жолында ақындық қасиетіңізбен қызмет ете беріңіз! – деді кездесуде аудан басшысы.
Кездесу барысында әкім мен ақын айтыстың ақтангері Манап Көкеновтың дәстүрлі мектебін жаңғыртып, жас ақындарды сөз додасына дайындаудың мән-жайын ақылдасты...
Руслан Рүстемұлының ақын-жазушы мен өнер адамдарын жақын тұтып, сый-құрмет көрсетіп жүретінін жақсы білеміз. Мәселен, Сырдария ауданының айтыскер ақыны Замадин Ибадуллавтың өзі туып-өскен ауданының «Құрметті азаматы» атағын алды және ақынның 80 жылдығына орай «Заңғар ақын – Замаддин» атты ақындар айтысын өткізіп берді. Осындай сарындағы құрмет Әбілқайыр Сыздықовқа да көрсетілгенін аңғардық.
Өз кезегінде Әбілқайыр Әбілпаттаұлын рухани қолдаудың мән-маңызы бар. Ол 1992-2013 жылдары мәдениет саласында түрлі деңгейде қызмет атқарып, аудан өнері мен мәдениетінің дамуына үлес қосты. «Халық ақыны» Манап Көкеновтің дәстүрлі ақындар мектебін жалғастырып, «Жүрсіннің жүйріктерінің» қатарында аламан айтысқа түсіп, дарынды, арқалы ақын ретінде елге танылды.
Айтыс өнерінен бөлек өлеңдерімен жас өрендерге рухани тәлім-тәрбие беріп, патриоттық рухын асқақтатып жүр. Оның «Мен қазақпын», «Тәуелсіздік толғауы», «Туған өлке», «Рухани жаңғыру жолымен», «Досқа сыр», «Айбынды Астана», «Қорқыт кешені басындағы кездесу», «Тәуелсіздік тартуы», «Қызылорда» және т.б өлеңдері ұрпаққа рухани азық, жастарға өнеге болары сөзсіз.
P.S.: Әбілқайыр Сыздықовтың Жастар Одағы сыйлығының лауреаты, «Ерең еңбегі үшін» медалін енді Қазақстан Республикасы Мәдениет саласының үздігі» төсбелгісі мен Жаңақорған ауданының «Құрметті азаматы» атағы толықтырады.
Нұрлат АЙТЖАН
