Біздің Нұрсұлтандар
1 желтоқсан – Тұңғыш Президент күні қарсаңында аудандық жұмыспен қамту, әлеуметтік бағдарламалар және азаматтардың хал актілерін тіркеу бөліміне бардық. Ондағы мақсат – Жаңақорған ауданы бойынша Нұрсұлтан есімді түлектерді анықтау. Атына заты сай ма?
Бүгінде Нұрсұлтан есімін жаңа туған сәбиге қою трендке айналды. Ондағысы елдің тұтқасын ұстайтын перзент болсын ниеттен туатыны анық. Қазақтың Нұрсұлтаны өтпелі кезеңде тарихи жауапкершілікті мойнына алып, саяси шешімдер қабылдап, елді өркениет көшіне қосты. Бүгінгі Қазақстанның жеңісі мен жетістігіне ерік-жігері, күш-қайраты, қабілет-қарымы жұмсалды. Қайраткер тұлғаның тағылымды жолы біздің жастарға жұғысты болсын...
Сонымен, бізде қанша Нұрсұлтан бар? Статистика комитетінің ақпаратына сәйкес, Қазақстанда Елбасының 18099 аттасы бар. Оның 1625-сі Нұр-Сұлтанда тұрады. Белгілі болғандай, 2020 жылы – 23, 2019 жылы – 41, 2018 жылы – 67, 2017 жылы – 104, 2016 жылы – 136, 2015 жылы – 205 сәбиге Нұрсұлтан есімі берілген-ді. Бір қызығы, Елбасының есімі қыздарға да берілген. Республикамызда бес Нұрсұлтан және екі Нұрсұлтана есімді қыз бар. Ал жеке куәлігінде Нұрсұлтан Назарбаев болып жазылған 56 адам тұрады екен.
Ал, біздің ауданымызда қанша Нұрсұлтан бар? Елбасы есімімен аттас азаматтар жайлы тиісті бөлімнің бас маманы Гүлнар Абдуллаевадан сұрадық. Біз оның көмегімен шаң басқан мұрағаттарды парақтап, біршама мәлімет алдық. Тәуелсіздік алғаннан бастап, бүгінгі таңға дейін Жаңақорған ауданында 221 Нұрсұлтан есімді ұл бала дүние есігін ашқан. Олардың ішінде, кәмелетке жасы толған мектеп жасындағы оқушылар да және мектеп жасына дейінгі бүлдіршіндер де бар. Мәселен, 1991 жылы дүниеге келген жеті нәресте Нұрсұлтан атанса, 2018 жылы – 3 нәрестеге, 2019 жылы – 1, 2020 жылы – 2 сәбиге Тұңғыш Президенттің есімі қойылды.
Тәуелсіздік алған 1991 жылы туған балаларға ата-аналары жаппай Нұрсұлтан есімін қойғаны есімізде. Адам есімі оның тағдырына әсер етеді деген сөз бар. Сол себепті де ата-ана баласына есімі елге белгілі тұлғалардың атын береді. Байқағанымыздай, біздің ауданымызда Нұрсұлтан атын иеленген азаматтар аз емес. Солардың бірі – Нұрсұлтан Әшірбаев 1993 жылы 11 наурызда дүниеге келді. Оның есімін әкесі қойыпты. Сөйтіп Нұрсұлтан Әбішұлына хат жолдап, баласының атын ырымдап қойғанын жазады. Арада көп уақыт өтпей, Елбасы өзінің кітабын жіберіпті. Осы кітапты ырымдап биікке қойып, сақтап келеді.
– Өзім Астана қаласында жұмыс жасаймын. Міне бес жылдан бері Президент күні тойланып келеді. Өзімді өте бақытты жанмын деп есептеймін. Елбасының есімі бұйырды, арнайы қолы қойылған кітабы да келді. Бұл маған үлкен күш береді. Адамның есімі оның тағдырына әсер етеді деген сөз бекер емес. Осы уақытқа дейін басымды төмен қарататын жағдайлар болмапты. Қай жерге барсамда жолым болып, айым оңынан туып жатады. Бұл тегін емес деп есептеймін», – дейді Нұрсұлтан Айдарханұлы.
«Жақсы сөз – жарым ырыс» деген аталы сөз бар. Адамның есімі де дәл солай. Жақсы есім оның болашағына үлкен бағдар іспетті. Содан болар ата-бабаларымыз балаларына қол бастаған батырдың, сөз бастаған шешеннің есімін берген. Міне, тұңғыш Президенттің есімін қойып, баласының болашағынан үлкен үміт күтіп отырғандар баршылық. Олай болса, жақсылықтың жаршысы Нұрсұлтандар көбейе берсін.
Әсел РЗАЕВА
