ҚР Парламентi Мәжiлiсiнiң депутаттары бүгiннен бастап 6 сәуiрге дейiн елiмiздiң өңiрлерiн аралайды. Бұл туралы бүгiнгi отырыста Төменгi палата төрағасы Нұрлан Нығматулин айтты, деп хабарлайды Baq.kz тiлшiсi.

«Бүгін депутаттық корпус сайлаушылармен кездесу үшін аймақтарға шығады. Біздің ең негізгі мақсатымыз - Президенттің бес әлеуметтік бастамасын және оның ерекше мүмкіндіктерін әр азаматқа, әрбiр отбасына жеткізу. Сонымен бірге, заң жағынан қамтамасыз ету жұмыстарымызды жан-жақты түсіндіремiз», - деді Нұрлан Нығматулин.

Мәжiлiс төрағасының айтуынша, депутаттар 6 сәуірге дейін өңірлерде болады. Олар кездесулерді облыс орталықтары мен ірі қалаларда ғана емес, шалғайдағы ауылдарда, елді мекендерде де өткізбек. Ал, өңірлерден оралғаннан кейін әлеуметтік бастамаларды жүзеге асыруға бағытталған заң жобалармен жұмысты бастамақ.