Жаңақорған аудандық соты 2019 жылдың I-ші жартыжылдық жұмысын қорытындылады

Жаңақорған аудандық сотында БАҚ өкілінің қатысуымен 2019 жылдың бірінші жартыжылдық қорытындысы бойынша баспасөз конференциясы өтті.
         
Шара барысында сот төрағасының міндетін атқарушы Ә.Б.Түбекбаева 2019 жылдың бірінші жартыжылдығында атқарылған жұмыстар жайлы баяндады.
Жаңақорған аудандық сотының өндірісінде аталған мерзімде барлығы 44 қылмыстық іс қаралып аяқталғанын, 20 іс бойынша айыптау үкімі 1 іс бойынша ақтау үкімі шығарылғанын, 21 қылмыстық іс өндірістен тоқтатылғанын, осы тоқтатылған қылмыстық істердің 16-ы бойынша тараптар медиация Заңы негізінде татуласқандарын, электронды түрде 16 іс қаралып аяқталғанын атап өтті.
Есепті мерзімде 322 азаматтық іс қаралып аяқталған, оның ішінде 56 арыз бойынша сот бұйрығы, 190 азаматтық іс бойынша шешім шығарылған, 46 азаматтық іс бойынша іс жүргізу тоқтатылған, оның 20-сы медиация тәртібімен тараптардың татуласуларына байланысты тоқтатылғанын, 23  арыз қараусыз қалдырылғанын, 70 азаматтық іс бойынша оңайлатылған іс жүргізу тәртібімен шешім қабылданған.
Ал, әкімшілік құқық бұзушылық істер жөнінде 2019 жылдың І-жартыжылдығында барлығы 325 тұлғаға қатысты 325 әкімшілік істер қаралғаны, 272 тұлға әкімшілік жазаға тартылғанын, 52 әкімшілік құқық бұзушылық іс тоқтатылғанын, оның ішінде 42 іс медиация тәртібімен тоқтатылғанын айтып өтті.
Сонымен қатар 2018 жылдан бастап аудандық сот ғимаратының бірінші қабатында ашылған құқықтық көмек көрсету бөлмесінде 4 кәсіби медиатор жұмыс күндері таңертеңгі сағат 09.00-ден кешкі 18.00 аралығында аудан халқына құқықтық көмек көрсетіп, Қазақстан Республикасы Жоғарғы Сотымен жүргізіліп жатқан «Татуласу, сотқа дейін, сотта» жобасы аясында татуластыру рәсімдерін кеңінен қолдануға септігін тигізуде.
Ағымдағы жылдың І жартыжылдығында сот ғимаратында қызмет көрсететін кәсіби медиаторлардың қызметіне 409 азамат жүгінсе, олардың 396-ы бойынша тараптар дауды медиация тәртібімен реттеу туралы келісім жасасып, осы негізде 396 дау бойынша сотқа дейінгі тәртіппен шешілген.
Жаңақорған аудандық сотында «Виртуалды сот» және «Түнгі сот» пилоттық жобалар аясында әкімшілік істер белсенді түрде қаралуда.
Аудандық сот төрағасының міндетін атқарушы Ә.Түбекбаева сот жүйесі қысқа мерзімде алға қарай үлкен қадам жасағанын айта келе, аудандық сотта жұмыс жасап жатқан «Виртуалды сот», «Түнгі сот» пилоттық жобалары - азаматтардың уақытын, олардың жеке қаражаттарын үнемдеп, істерді қарау мерзімін қысқартып, сот жүйесінің ашықтығы мен қолжетімділігін арттыратынын айтып өтті. Осы жобалар аясында аудандық сотта 17 әкімшілік істер виртуалды тәртіппен және 2 іс түнгі сотта қаралғанын жеткізіп, сонымен қатар, сот жүйесін цифрландыру бойынша, электрондық сот істеріне ауысу, «Сот кабинеті» сервистерін пайдалану, «True Conf» қосымшасын ұялы телефондарға жүктеу, оны қолдану арқылы сотқа келместен сот отырысына қатысу мүмкіншіліктерін түсіндіріп өтті.
БАҚ құралдарымен тығыз жұмыстар атқарылып, телеарна арқылы 2 рет сұхбаттар берілген, 7 рет аудандық сотта «Ашық есік» шарасы өткізіліп, құқықтық ағарту бағытында мемлекеттік мекемелермен 31 рет семинар сабақтары мен дөңгелек үстелдер өткізілген.
Баспасөз конференциясын қорытындылай келе сот төрағасы міндетін атқарушы алдағы уақытта да сот төрелігінің сапасын арттыруға, сот жүйесін нығайтуға барлық шаралар қолданылатынын атап, өңірлік «Жаңақорған тынысы» газетінің тілшісінің барлық сұрақтарына жауап бере отырып,  алғысын білдірді.

Қайнар: Жаңақорған аудандық сотының баспасөз қызметі