Елбасының әр сөзі жастарды жігерлендірді

Бұл жай ғана құнды құжат емес, не болмаса жоспарлы бағдарлама ғана емес. Ең алдымен, Елбасының сөзі - бұл қиын-қыстау заманда халыққа айтылған Ұлы елдің тұңғыш көшбасшысының батасы. Бата - қазақ елі үшін қасиетті. Батада үлкен мән-мағына, үлгі-өнеге, үлкенді сыйлаған дәстүріміз бен салтымыздың нышаны бар. Тарихи тұлғаның, рухани көшбасшысының сөзін тыңдау, одан бата сұрау - тәрбие мен тектіліктің көзі деп білеміз. Қазақ «Батамен ел көгерер, жаңбырмен жер көгерер», - деген сөзді бекер айтпаса керек.


Ел тарихына үңілсек, ашаршылық, репрессия, отаршылдық секілді қиын-қыстау жолдардан аман-есен өткен, сөйте тұра, ешкімге ешқашан құл болмаған, мыңжылдық тарихы бар халықпыз. Сондықтан біздің бірлігіміз бен берекеміз, шыдамдылығымыз арқылы бүгінгі қиындықтан да сәтті өтетініміз анық.
Ел ішінде дүрбелең тудыруға жол бермей, бар мүмкіндікті дұрыс пайдалансақ - әлбетте, жеңімпаз болып шығамыз. Елбасы алдағы аға буынмен бірлесе отырып жаңа Қазақ мемлекетінің негізін салып, бізге, кейінгі ұрпаққа, аманат етіп берді. Оны қастерлеп, көздің қарашығындай сақтап, ары қарай дамыту - бәрімізге ортақ өмірлік миссия емес пе?
Әлеуметтік желілерге байланып, негативті жалған ақпараттарды қабылдап, таратқанша, алтын уақытымызды оңды істерге пайдаланғанымыз жөн. Бизнесті қалай дамытамыз, ішкі процесстерді қалай өзгертеміз, дағдарыстан кейінгі нарықта үлкен сұранысы бар маманға қалай айналамыз дегенді ойлайтын заман қазір.
Кітап оқып, қарым-қатынастарымызды реттеп, үй ішін таза ұстап, физикалық жаттығу жасап, онлайн ларын игеріп, позитивке аса мән беретін болсақ - дағдарыстан жаңаша күймен шығамыз, Абай айтқандай, «толық адам» болып шығамыз.
Пандемия - ақыр заман емес. Ол да көшпен бірге кетеді. Одан кейін адам да, заман да өзгеріп, әлемге жаңа кәсіп пен білім қажет болады. Бәріміз оған лайықты өз орнымызды табуымыз қажет. Жүректегі ақыл, білектегі күш, ынта мен жігерді қоса ұстасақ, бар қиындықты жеңеміз.
Тәуелсіздіктің алғашқы жылдары сан алуан қиындық пен дағдарысты Елбасымен бірге бастан өткердік. Бүгінгі қиындықтан да  бірге өткереміз. Аман болайық! #BizBirgemiz
Наурызбай Орынбасаров. Жаңақорған жастар ресурстық орталығының директоры.