«ҮЗДІК САҚШЫ»
Сұлтанахмет Әбуов. Аудандағы жол белгілеріне жауапты полиция қызметкері. Тоқсан сайын жол жағдайлары мен белгілерін зерделеп, қадағалап, әкімдіктерге ұсыныс айтып, аудандық тұрғын үй-коммуналдық шаруашылығы, жолаушылар көлігі және автомобиль жолдары бөліміне нұсқау беру оның құзырында. Әрине, ұсыныс беріліп жүргенін көріп жүрміз, оны орындай атқа мінерлердің міндеті. Сондықтан аудандық полиция бөлімі жылдың үздігіне Сұлтанахмет Нышанұлын лайықты деп таныды.
Ол қазір бөлімде әкімшілік полиция қызметкері, мемлекеттік инспектор. Бұл қызметті 2015 жылдан бері атқарып келеді. Жалпы еңбек жолын 2004 жылы қалалық ішкі істер басқармасында бастайды. Одан кейін аудандық полиция бөлімінде сегіз жылдай жауаптыларды уақытша ұстау изоляторында қызмет етеді. Қорқыт Ата атындағы Қызылорда мемлекеттік университетінде жол қозғалысын ұйымдастырушы мамандығын бітірген ол бүгінде отбасылы. Жары Әлия Бақытқызы екеуі 3 ұл, 2 қыз тәрбиелеп отыр. Жары «Болашақ» балабақшасында тәрбиеші.Жалпы алғанда 15 жылдан астам полиция қызметінде адал еңбек етіп келе жатқан Сұлтекеңді үздік деп таныдық. Үнемі әкімдікпен тығыз байланыста жұмыс жасайтын тәртіп сақшысының еңбегіне жаңақорғандықтар жоғары баға берді.
