Жаңақорған ауданы әкімі Ғалым Әміреевтің аудан тұрғындары алдындағы есептік кездесуіне облыс әкімі Қырымбек Көшербаев қатысып, ауданда атқарылып жатқан жұмыстарды саралады. Әрі облыстың экономикалық әлеуетін арттыру бағытындағы бастамаларына тоқталды. Алдағы жоспарларымен де бөлісіп, «Жақында Қытай Халық Республикасына жұмыс сапарымен барып, экономиканы цифрландыру, жасыл энергетиканы мен кәсіпкерлікті дамыту және т.б. салада тәжірибе алмасамыз» деген еді.
Бүгінде аймақ басшысы бастаған Қызылорда облысының делегациясы Қытайда болды. Сапар аясында делегация мүшелері Бейжің және Шэньчжэнь, Шанxай қалаларында болып, бірқатар ірі кәсіпорындарының жұмысымен танысты.
Кеше Бейжің қаласында көмір, су электрстанцияларын салу және т.б. салаларда мол тәжірибесі бар CNEEC (Қытай ұлттық электр инжиниринг корпорациясы) компаниясының басшылығымен кездесті. Басқосуда Қызылорда облысында су және күн электр стансаларын салу жобалары талқыланды.