ҰШҚЫШСЫЗ ҰШАТЫН ҰШАҚ
Дубайда өзін өзі басқаратын ауа таксиінің алғашқы ашық сынағы өтті. Бұл туралы Дүниежүзілік үкімет саммитінде БАӘ-нің автомобиль және көлік бөлімінің бастығы Маттар Эль Тайер мәлімдеді, деп хабарлайды motor.kz ақпараттық порталы Associated Press-ке сілтеме жасап.
Аталған жаңа көлік түрі алдағы 10 жыл ішінде қала тұрғындары мен қонақтарына қызмет көрсететін болады. Олардың мәліметінше, эмират басшылығының жоспарына сәйкес, 2030 жылға дейін Дубайдағы барлық көлік дербес автокөліктердің көмегімен жүзеге асырылмақ.
Сынақ барысында аталмыш ұшақ ААТ дронның көмегімен 200 метр биіктікке көтеріліп, Дубайдың көптеген жағажайын айналып өтіп, орнына қайта сәтті қонған. Сынақтың жалпы ұзақтығы 5 минутты құраған. Сынақ уақытында кабинада адам болмаған. Дронның AAT атауы Autonomous Air Taxi сөз тіркесінің қысқарған нұсқасы. Ол «Автономды ауа таксиі» деген мағына береді.
Электронды қозғалтқыш арқылы жұмыс істейтін көлік өзгелерге қарағанда әлдеқайда шағын, әрі аз дыбыс шығарады. Кабинаға екі адам сияды және олардың қауіпсіздігі үшін көлікке арнайы парашюттер мен 9 қосымша батарея орнатылған. Дрон ауада 18 пропеллер күшімен ұшады, оның круиздік жылдамдығы — 50 км/сағат, ал максималды жылдамдығы — 100 км/сағат.
Ұшқышсыз ұшу аппараттарының паркі EHang қытай компаниясы автомобильдерінен тұрады. Ұшақ кабинасында сенсорлы экраны бар, ол арқылы қажетті нүктені орнатуға болады.
Пікір 2