Жас маманды жұмысқа қабылдаған аурухана басшысы Абибулла Акимовтың тапсырмасымен ауыл әйелдерінің денсаулығын нығайтуға белшеше кірісті. Өзге әріптестері сияқты Талап, Кеңес және Апанқақ елді мекендерінің қызкеліншектерінің жай-күйін тексеріп тұрды. Қойшы ауылдарды да аралап, маусымдық тексерістен өткізеді. Әр заманның өз қызығы мен қиыншылығы болады десек, сол жылдары алыс елді мекендерде аналар үй жағдайында босануы қалыпты жағдай іспетті еді. Өмір мен өлім арасында арпалысқан тұста ақ халат киген дәрігерлер аққанатты періштедей көмекке жетіп, перзент пен ананы аман алып қалудың әрекетін жасайтын еді. Міне, осындай ауыр шақтарды еңсеріп, мединина саласымен бірге қыры жыл бойы дамудың даңғыл жолын өткерді. Өзімен бірге қызметтес болған Рысжан Төлепбергенова мен Күләш Шегебаевалардың қолдауы жұмысына деген шабытын оятқандай. Қызмет барысында қандай да бір қиындық туындаған жағдайда ең бірінші болып хабарласатын жанашыры аудандық арухананың бас геникологы Мария Жұмағалиеваның әрбір кеңесін қалт жібермей, тәжірибесін шыңдады. Осы кісіні кәсіби ұстаз санап, біліктілігін арттырды. Әйелдер консультациялық қызметпен перзентхана жұмысын қоса атқарған күндері көп болды.

Қырық жылдық еңбек жолында ауылдық ауруханада қалтқысыз қызмет етіп, талай жас мамандарға тәлімгер болды. Кей жағдайларда аудандық ауруханада мамандар жетіспей жатқанда апталық, айлық тәжірибе алмасуларға қатысты.

Бүгінде зейнеткерлікке шыққан Күлзада Әмірбекова 7 баладан өрген жиырмаға жуық немеренің ақ әжесіне айналды. Жолдасы Әбсұлтан Өтенбаевпен жарасымды отбасын құрып, үлгі-өнегесін ұрпағына ұлықтауда.

– Қоғамның даму динамикасымен бірге біз де бірге дамыдық. Медицина саласының қарқынды дамуына барша халық өз күшін қосты деп санаймын. Еліміз жас әрі бақуатты, сондықтан әрбір маман өзінің білімін заманға сай дамытып, іскерлігін ұштастыра алуы керек. Еңбек ешқашан елеусіз қалмайды, – деді кейіпкеріміз.