Мемлекеттік тіл – айбарым

Тіл – ұлттың ұлы игілігі, әрі оның ажырамас бөлігі. Кез келген халықтың болмыс-тіршілігі, өркениеттілігі, мәдениеті сол тілдің қолданыс ауқымдылығымен өлшенеді. Міне, осы себепті мемлекеттік тіл мәртебесін асқақтату мақсатында аудан төңірегінде илкімді істер атқарылып келеді. Аудандық мәдениет және тілдерді дамыту бөлімінің ұйымдастыруымен «Мемлекеттік тілдің бүгіні мен ертеңі» атты кездесу өтті.

Еліміз Тәуелсіз мемлекет атанғалы бері, ана тіліміздің қолданыс өрісі кеңейіп, тіліміз мемлекеттік мәртебеге ие болды. Бұл жөнінде қарымды қаламгер Пахмадин Айнақожаев тарқатты.
– Мемлекеттік тіл – бүкіл қазақстандықтардың тілі. Сондықтан да «Мемлекеттік тілдің проблемасы – тек қазақ халқының ғана проблемасы» – деп қарауға болмайды. Әлемдегі барлық өркениетті елдердегідей мемлекеттік басқару жүйесінде қызмет істейтіндердің бәрі бұл тілді білуі шарт. Елімізде мемлекеттік тілдің қолдану аясын кеңейту – бүгінгі таңдағы өзекті мәселе. Ал бұл істің шешуі шыдамдылық пен табандылықты талап етеді. Тілді үйрету зорлықпен емес, шынайы ынтамен ыңғайлайтын шаруа. Мемлекеттік тілді білу – кәсіби талап. Мұны Тұңғыш Президентіміз Н.Ә. Назарбаевтың Қазақстан халықтары ассамблеясының ХІІ сессиясында сөйлеген сөзінен байқауға болады. «Қоғамға біздің тіл саясатымыздың мәнін тереңірек және дәлірек түсіндіру керек», – дейді ардагер.
Мемлекеттік тіл – еліміздің азаматтарын топтастырудың мықты іргетасы болары хақ. Әрбір қазақстандық мемлекеттік тілді құрметтеуге, оны үйреніп, білуге бейім болғаны абзал. Өйткені, қазақ тілі – еліміздегі халықтардың басым бөлігінің тілі. Болашақта мемлекеттік тіл ретінде оның мәртебесі біздің елімізде қоғам биігінен көрінуге тиіс. Бұл туралы «Қызылорда облысының тілдерді оқыту орталығының» КММ-нің Жаңақорған ауданы бойынша мемлекеттік тіл орталығының мемлекеттік оқытушысы Айгүл Төлепбергенова талдады.
Басқосуда «Жаңақорған тынысы» газетінің тілшісі Мақпал Патенова сөз алып, жастар арасындағы жаргон сөздердің жиі айтылатынын тілге тиек етті. Сондай-ақ, жастар ресурстық орталығының жастар ісі жөніндегі маманы Бекзат Өмірзақов, Төменарық ауылдық округінің жастар ісі жөніндегі маманы Мағжан Әзиз, Қоғамдық келісім мекемесінің сарапшысы Асхат Ильясов, мәдениет және тілдерді дамыту бөлімінің тіл маманы Ақниет Алмас мемлекеттік тіл жөнінде пікірлерін ортаға салды.

Жәмила ЕРМАХАН