Елдегі карантин режиміне байланысты шектеу щаралары күшейтілуде. Кейбір өңірлер індеттің алдын алу мақсатында карантин жүйесін қатаң бақылауға алды. Сондықтан көптеген мәдени, спорттық іс-шаралар тек онлайн түрде өткізілуде. Біздің ауданның өнер ұжымы да жоспарлы шараларын онлайн бағытта ұйымдастырып, көрермендер ықыласына бөленуде. Біз қазан-қараша айында өткен шараларды саралап, бірқатарын басылым бетіне жариялауды жөн көрдік.
«Туған өлкем – Жұмақ мекен»

«Жастар ресурстық орталығы» КММ қолдауымен, «Ашық азаматтық қоғам» ақпараттық-ресурстық орта­лығының ұйым­дастыруымен «Туған өлкем – жұмақ мекен» аудандық үздік бейнероликтер бәй­гесінің қорытынды кеші өтті.
12 бейнероликтердің арасынан үздік деп танылған 3 ролик таңдалып алынды. Бағалау барысында түсі­рілген бейнероликтердің сапа­сына, тақырыптың ашылуына бай­ланысты қойылған критерийлер сараланды. Нәтижесінде жүлделі орындарды «Жаңақорған құрама» коман­дасының жайдарманшылары Құлтас Асхат пен Әліби Мусаханов екінші-үшінші орынды өзара бөлісті. Ал бірінші орын «Kenantorecinema» орталығына бұйырды.

Абай жаққан бір сәуле сөнбес үшін

Абайдың 175 жылдығы аясында мәдени-рухани шаралар көптеп ұйымдастырылып, ақын ның өмірі мен шығармашылығы дәріп­телу­де. Манап Көкенов атындағы аудандық мәдениет үйінде Абай шығармашылығын өскелең ұрпақ­тың санасына сіңіру мақсатында «Абай жаққан бір сәуле сөнбес үшін» атты байқау өткізілді. Рухани кеш ішкі саясат бөлімінің «Жастар ресурстық орталығы» және аудандық мәдениет үйінің «Жас­тармен жұмыс» бөлімшесі мен Ашық азаматтық қоғам ақпараттық-ресурстық орталығының ұйытқы болуымен өтті.
Дана Абайдың шығармашылық мұрасын дәріптеуді мақсат еткен шараға 8-11 сынып оқушылары қатысты. Шара тіл көркемдігін, сөз байлығын, оқушы дүниетанымын, ой-өрісін дамытуды мақсат етті. Бұл іс-шара бір жағынан, оқушының білім деңгейін көтерсе, екінші жа­ғынан, тіл сауаттылығын арт­тыруға септігі мол.
Нәтижесінде жүзден жүйрік танылған Төменарық ауылының қос тума­сы Ұлжан Асылбекқызы бірінші орынды, Өмірсерік Батырхан екінші орынды иеленсе, ал аққұмдық Әліппай Мерей үшінші тұғырдан көрінді. Жеңімпаздарға арнайы смарт­фондар табысталды. Ал қалған қатысушы үміткерлерге «Ал­ғыс хаттар» мен бағалы сый-сияпаттар берілді.
Абайды қалай дәріптесек те жарасады. Оның ғибратты ғұмыры мен шынайы шығармашылығы – қазақ халқына ғана емес, жаһан жұртына да үлгі-өнеге. Абайдың адам мен қоғам, білім мен ғылым, дін мен дәстүр, табиғат пен қоршаған орта, билік пен бұқара туралы айтқан ой-тұжырымдары өміршеңдігін көрсетіп келеді. Өйт­кені ақынның мұрасы адамзат баласының рухани азығы.

Виртуалды кітап көрмесінің мақсаты неде?
Жаңақорған аудандық орталық кітапханасының ұйымдастыруымен ғалым, ағартушы, тарихшы Шоқан Уәлихановтың туғанына 185 жыл толуына орай «Дарынды ғалым, демократ» атты виртуалды кітап көрмесін ұсынды. Шараның мақ­саты – Шоқан Уәлихановтың сан қырлы ғылыми еңбектері туралы кеңінен мағлұмат беру, елі, халқы үшін істеген игі істерін үлгі ету. Шоқанды тану арқылы ұлттық сана мен патриотизмге, рухани білімділікке, мәдениеттілікке тәр­биелеу. Ұйымдастырылған шара өз деңгейінде өтіп, көпшіліктің көңілінен шықты.

Тілеу Тотаевты
еске алу кеші

Ұлы Отан соғысы және еңбек ардагері Тілеу Тотаевтың 100 жыл­дығына арналған «Ғибратты ғұмыр» атты еске алу шарасы өтті.
Шара барасында үсті­міздегі жылы Ұлы Жеңістің 75 жылдығына орай ұйымдастырылған Т.Тотаев атындағы «Жеңіске жетелеген жыр­лар» атты патриот­тық ән орындау шеберлері бай­қауы қор­тындыланып, байқау жеңім­паздары марапатталды. Сон­дай-ақ екі шақырымға жүгіруден желаяқтар жарысы және т.б спорттық ойындар ұйымдастырылды. Естеліктер айты­лып айтыскер ақын Әбілқайыр Әбіл­паттаұлының арнау өлеңдері оқылды.

Сапарғали Бегалиннің туғанына 125 жыл

Жаңақорған аудандық балалар кітапханасы жазушы, қазақ бала­лар әдебиетінің көр­некті суреткері Сапарғали Бега­линнің туғанына 125 жыл толуына орай «Бала Шоқан» атты повестіне арналған танымдық бейнероликтерін ұсынды.
Жазушы туралы мағлұмат бе­ру, шығарманың мазмұнын иге­ріп, идеясын ашу, оқушыларды адамгершілік қасиет­терге, жана­шырлыққа, уәдеге берік­тікке үйрету, өнерге деген қызығушылығын арттыру, таным қабілеттерін, шы­ғар­машылығын дамыту мақ­сатында өте әдемі туынды көпшілікке жол тартты.

«Сауран думан» шарықтаған кеш

Қандөз ауылдық клуб үйі ұйым­дастыруымен Қандөз ауылының тумасы, әнші-композитор, ғалым Сауран Елеуовтың «Сауран думан» атты отбасылық онлайн концерті көрермендерге жол тартты.
Елге еңбегі сіңген композитор жанды дауыста ән шырқап, өнер сүйеу қауымның ыстық ықыласына бөленді.
Жалпы Сауран Елеуовтың есі­мі Сыр жұртына ғана емес, елге танымал екені рас. Өнер адамының биігі тыңдармандарымен қауышып, ыстық ықыласына бөленгені ғой, сондықтан сазгердің сазды әндері көрермендеріне тағы бір рет ұсынылды.
Жалпы алғанда аудандағы іс-ша­ралар осылай жүйеленді. Әлі де елдің рухын асқақтатар кеш­тер өтеді, рет-ретімен ақпа­раттандыратын боламыз.

Асел