Қызылорда облысында үшем дүниеге келді

Сырдария ауданына қарасты Қалжан ахун ауылында тұратын Қиясовтар әулетінде бұдан бұрын бес перзенті болған. Өткен жылы 34 жастағы отанасы егіз сәбиді дүниеге әкелді. Бақытбек Қиясов пен Эльвира Әбдіғаппарованың қуанышын бөліскен облыс әкімі Нұрлыбек Нәлібаев құттықтау хатын жіберді.
Хатты облыстық ішкі саясат басқармасының басшысы Мира Қазбекова мен облыстық денсаулық сақтау басқармасының басшысы Сәбит Пазылов табыстады.
«Дүние дидарына келіп, әулетті қуанышқа бөлеген бауыр ет балапандарыңыз еліне елеулі, ұлтқа адал қызмет етер азамат атансын! Шаңырақтарыңызды қуанышқа кенелтіп жатқан үшемдердің бауы берік, өмір жасы ұзақ болсын», деп жазылған аймақ басшысының құттықтауында.
Айта кетейік, бұл Қызылорда облысында биыл дүниеге келген алғашқы үшем. Қызылорда аймағы туу көрсеткіші бойынша елімізде алдыңғы орында келеді. Өңірде жылма-жыл 19-20 мың нәресте өмір есігін ашады.