ӘКІМДЕР ЕСЕБІ: БЮДЖЕТІ ДЕРБЕС ҚОЖАКЕНТ

Өткен жылдан бастап еншісін алған елдімекеннің бірі – Қожакент. Бюджет бүйірін толтырудағы тірлігі тындырымды ауыл 4-деңгейлі бюджет бойынша бекітілген болжамды 120,8 пайызға артық орындаған.

Алайда ауылда тіркелген 120 дара кәсіпкердің 90-ы әлі күнге мүлдем салық төлемей отыр. Бұл жөнінде аудандық Мемлекеттік кірістер басқармасы басшысының орынбасары Талғат Мұстафаев тілге тиек етті. Оған қоса, 4 салық төлеушінің жылдық айналымы 2 млн. теңгеден асқанымен, мұндай көлемдегі салық төлеушілер санын 48-ге жеткізуге болады екен. Аудан әкімі Ғалым Әміреевтің де қойып отырған талабы осы. Яғни, тауар айналымы 2 млн. теңгеден асатын кәсіпкерлер санын арттыру. Сондай-ақ ауыл әкімі А.Айтжанов мемлекеттік-жекешелік әріптестік шеңберінде елдімекенде спорттық-сауықтыру кешені мен қоғамдық монша салуға қос кәсіпкер қарекет жасап жатқанын мәлімдеді.

Айтпақшы, ауыл әкімі есепті кездесу соңында жүлде қоры 100 мың теңге болатын жоба жариялады. Үй іргелік ауласына ең көп саялы ағаш егіп, жасыл желекке айналдыра білген отбасын қаржылай марапаттайды. Үздік саялы ауланы Ұлыстың Ұлы күні қарсаңында ауылдық ардагерлер кеңесі тарапынан құрылатын комиссия анықтайды.