Сыр өңірінің журналистері Мәскеу қаласына халықаралық ғылыми оқылымға қатысып, тәжірибе алмасу үшін арнайы барды, деп хабарлайды zhanaqorgan-tynysy.kz тілшісі.

Қызылорда облысы әкімі Қырымбек Көшербаевтың қолдауымен Сыр өңірі аудандық газеттерінің өкілдері Мәскеу қаласы М.Ломоносов атындағы Мәскеу мемлекеттік университетінде өтетін Х халықаралық «БАҚ және жаппай байланыс-2018 (СМИ и массовые коммуникации–2018) ғылыми оқылымына қатысуда.

Жалпы, конференция бірнеше секция бойынша бөлініп, әлемдік трендтке айналған тақырыптар қозғалады. Яғни, сандық медиа түрлендіру: аймақтық, ұлттық және жаһандық аспектілері (цифрлы журналистика, аймақтық БАҚ бәсекеге қабілеттілігі, жанрлардың араласуы және т.б. өзекті тақырыптар) арқау болды.

Сондай-ақ, БАҚ тарихы және қазіргі медианың динамикалық дамуы, БАҚ уақытқа сай аудиториясын кеңейту жолдары, журналистиканы цифрландыруда қазіргі қиындықтар мен перспективалары, заманауи журналистика: міндеттері, проблемалары және перспективалары тақырыбында келелі мәселелер қозғалды.

Конференциядан кейін Сыр өңірінен келіп Мәскеуде білім алып жүрген жастармен кездесу жоспарланған.

Ғылыми шара және жастармен кездесу жайында алдағы уақытта толық беретін боламыз.