Шымкенттен Түркияға 227 млн теңгенің алтынын заңсыз алып өтпек болған
Бас көлік прокуратурасының хабарлауынша, Өзбекстан азаматтары 2,8 келіге жуық алтынды Шымкент әуежайы арқылы Түркияға заңсыз алып өтпек болған. Бағалы металды кедендік бақылаудан жасыру үшін оның бөлшектерін шабадандардың ішкі астарына және жүк қаптамаларына жаққан.
«Сот үкімі шыққанға дейін құны 227,8 млн теңгені құрайтын 2,8 келіге жуық алтын мемлекет пайдасына тәркіленді. Бұл шешім Бас көлік прокуратурасының өтінішхаттары негізінде қабылданды», - делінген хабарламада.
Күдіктілерге халықаралық іздеу жарияланған. Сотқа дейінгі тергеп-тексеру амалдары жалғасып жатыр.
