АБЫРОЙЛЫ ЕҢБЕК – ӨНЕГЕЛІ ӨМІР

Еңбекпен өрілген ғұмыр – елге қалдырған өнеге, ал адамдықпен биіктеген абырой – өмірлік ең қымбат марапат.
Адам өмірінің мәні – атқарған қызметінің ұзақтығымен емес, сол жолда елге сіңірген еңбегімен, айналасына шапағатын тигізіп, артында қалдырған ізгі ізімен өлшенеді. Саналы ғұмырын білім мен тәрбиеге, қоғамдық қызмет пен руханиятқа арнап, абыройлы еңбегімен ел құрметіне бөленген Адырбек Сопыбеков атындағы аудандық кітапхананың директоры, «Қазақстанның құрметті кітапханашысы» Әсемкүл Манапқызы Тілеубергенованың құрметті зейнет демалысына шығуына орай «Абыройлы еңбек – өнегелі өмір» атты салтанатты кеш өтті.

«Руханият» орталығында өткен тағылымды басқосу – бір адамның еңбек жолына тағзым етіп қана қоймай, тұтас бір ғұмырдың өнегесін ұлықтаған, адал қызмет пен азаматтық болмысты ардақтаған жүрекжарды құрметтің көрінісі болды.

Салтанатты жиынды аудан әкімінің орынбасары Жахудаев Нариман Үсенұлы ашып беріп, аудан әкімінің құттықтау хатын оқып, Әсемкүл Манапқызының ауданның қоғамдық өмірі мен руханият саласына сіңірген еңбегіне жоғары баға беріп, ізгі тілегін жеткізді.

Ұстаздықтан басталған жол – руханиятқа ұласқан ғұмыр.
1965 жылы Кейден ауылында дүниеге келген Әсемкүл Манапқызы Қызылорда педагогикалық институтының математика факультетін тәмамдап, еңбек жолын ұстаздықтан бастады. Өмірінің алғашқы еңбек белестерінде жас ұрпақтың тәрбиесі мен біліміне жауапкершілікпен қарап, пионерлер үйінің директоры, №125 мектептің тәрбие ісі жөніндегі орынбасары қызметтерін атқарды. Бұл кезеңдер оның ұйымдастырушылық қабілетін шыңдап, елге қызмет етудің үлкен мектебіне айналды.
2005–2017 жылдары аудандық ішкі саясат бөлімінде жетекші және бас маман қызметтерін атқарып, қоғамдық өмірдің маңызды бағыттарында жемісті еңбек етті. Аудандық мәслихат депутаты ретінде де ел игілігіне бағытталған бастамаларға араласып, қоғам алдындағы азаматтық жауапкершілігін абыроймен атқарды.
Әсемкүл Манапқызының еңбек жолындағы айрықша белес – кітапхана саласындағы қызметі. Кітапты рухани қазына, кітапхананы ұлттың зияткерлік әлеуетін қалыптастыратын қасиетті орда деп білген ол соңғы он жылға жуық уақытта аудандық кітапхананың дамуына сүбелі үлес қосты. Оқырман мен кітап арасындағы рухани байланысты нығайтып, ұлттық құндылықтарды ұлықтауға, әдеби мұраны насихаттауға және кітапхана беделін биіктетуге күш салды.

Кітапхана – тек кітап сақтайтын орын емес, ол – ұрпақтың танымын кеңейтетін, ойға ой қосатын, рухани дүниені байытатын киелі мекен. Осындай құндылықтарды ту еткен Әсемкүл Манапқызы басшылық еткен жылдарында іскерлігімен, парасат-пайымымен, адамгершілік қасиетімен және ұжымға деген жанашырлығымен әріптестерінің құрметіне бөленді.

Кештің өн бойында айтылған әрбір жылы лебіз, әрбір тағылымды естелік – жылдар бойы жинақталған сыйластық пен шынайы құрметтің айғағы болды. Еңбек ардагерлері, әріптестері, замандастары мен шәкірттері ардақты жанның кәсіби біліктілігін, кісілік келбетін, елге деген адалдығын тебіреніспен еске алып, жүрек түкпіріндегі ризашылықтарын жеткізді.

Журналист, «Жаңақорған тынысы» газетінің бас редакторы Баян Үсейінова жүргізген кеш мазмұнды естеліктермен өріліп, әсем ән мен әсерлі жырға ұласты. Әрбір тілек пен естелік Әсемкүл Манапқызының өмір жолындағы еңбегі елеусіз қалмағанын, адамдық болмысы мен азаматтық ұстанымы көпке үлгі болғанын аңғартты.

Зейнет демалысына шығу – еңбек жолының аяқталуы емес, өмірдің жаңа кезеңіне қадам басу. Бұл – жылдар бойы атқарған істің жемісін көріп, маңдай тердің өтеуін сезініп, жақындардың ортасында алаңсыз ғұмыр кешетін шақ. Ал елге сіңген еңбек пен жүректерге ұялаған құрметтің зейнеті болмайды.

Құрметті Әсемкүл Манапқызы!

Сізді құрметті зейнет демалысына шығуыңызбен шын жүректен құттықтаймыз!
Өмір жолыңыздағы әрбір белес – табандылықтың, жауапкершіліктің және елге деген адалдықтың үлгісі. Ұстаздық қызметтен басталған абыройлы жолыңыз қоғамдық қызметпен толығып, руханият саласындағы жемісті еңбегіңізбен жалғасын тапты. Сіз атқарған қызметтің ең үлкен нәтижесі – ел ықыласы, әріптестер құрметі және кейінгі буынға қалдырған өнегеңіз.

Алдағы өміріңіз шуақты күндерге, отбасыңыз шаттыққа, шаңырағыңыз береке мен мерекеге толсын! Деніңізге саулық, жаныңызға тыныштық, ғұмырыңызға ұзақтық тілейміз. Бала-шағаңыздың қызығын көріп, жақындарыңыздың ортасында қадір-құрметке бөленіп, еңбегіңіздің игілігін көре беріңіз!

Абыройлы еңбек – ел жадында сақталар шежіре. Өнегелі өмір – ұрпаққа аманат болар асыл мұра.

Еңбегіңіз ел есінде, есіміңіз құрмет төрінде, өнегеңіз кейінгі буынның жүрегінде қала берсін!