СЕГІЗ ҮМІТКЕР. ҚАЙСЫСЫ БАСЫМ?

Екі апта бойы әлем жұрты футбол мерекесін тамашалауда.48 құрама командадан 8-і қалды.Иә, әлем чемпионатының табиғаты тым қатал.Франция, Испания, Англия, Аргентина... Бұлар үнемі фаворит саналатын құрамалар.
Бірақ осы сегіздіктің ішінде Марокко, Норвегия, Бельгия мен Швейцарияның болуы – 2026 жылғы әлем чемпионатының басты ерекшелігі.Бұл турнир маған бір нәрсені анық көрсетті.
Футбол алыптарының үстемдігі аяқталып келеді. Әсіресе, Аргентина – Египет матчы осы ойымды одан әрі нығайтты. Норвегия Бразилияны жарыс жолынан шығарды.Бұрын құрамында бірнеше супержұлдызы бар команда міндетті түрде жартылай финалға дейін жететін. Қазір олай емес. Қазір жүйе жеңеді. Тәртіп жеңеді. Бір-бірі үшін жанын беретін команда жеңеді.Мысалы, Францияны алайық.
Көпшілік тағы да Мбаппе туралы айтып жүр.
Әрине, ол әлемнің ең қауіпті шабуылшысының бірі. Бірақ осы чемпионатта мені басқа ойыншы таңғалдырды. Ол – Майкл Олисе.
Статистикаға қарасаңыз, голы көп емес.
Бірақ ойынға қарасаңыз, Франция шабуылының тынысы сол.Англия туралы да бұрынғы пікірім өзгерді.
Осыған дейін ағылшындарды көп сынадым.
Себебі олар әлемдік деңгейдегі футболшыларды шығарады.
Бірақ құрамасы шешуші сәтте үнемі сүрінетін.
Бұл жолы басқа Англияны көріп отырмын.
Мексикамен кездесуде бүкіл ауыр салмақты Харри Кейн ғана көтерген жоқ.
Ортада Джуд Беллингем әр шабуылды бастап, әр қауіпті сәттің ішінде жүрді.Ал Испания бұрынғы Испания болып қала берді. Допты қарсыласқа бермейді. Өз ырғағын таңады. Бірақ дәл осындай ойын стилінің бір әлсіз тұсы да бар.
Плей-офф кезеңінде қарсылас көп мүмкіндік бермейді. Бір ғана мүмкіндік береді.
Соны пайдалана алмасаң, бүкіл үстемдігің ештеңеге тұрмай қалуы мүмкін.Марокко туралы ерекше айту керек.
2022 жылғы жетістікті көпшілік тосын оқиға деп қабылдаған.
Бірақ арада төрт жыл өтті.
Марокко тағы да әлемнің үздіктері арасында.
Демек, бұл кездейсоқтық емес.
Бұл – дұрыс құрылған футбол жүйесінің жемісі.Ал осы чемпионаттың ең үлкен жаңалығы...
Мен үшін ол – Норвегия.
Иә, Холанд – әлемдік жұлдыз. Бірақ Норвегия тек Холандтан тұрмайтынын дәлелдеп келеді.
Бразилияны жеңу – эмоция емес. Бұл бірнеше жылдық еңбектің нәтижесі.Бельгия қайта оралды.
Ал Швейцария тағы да санасу керектігін дәлелдеді.Меніңше, дәл қазіргі футболына қарап бағаласақ, финалға ең лайық екі құрама – Франция мен Англия.Францияның артықшылығы – ойын сапасы.
Англияның артықшылығы – психологиясы.
Бірі матчты басқаруды біледі.
Екіншісі матчты жеңуді біледі.
Егер осы екі команда финалда кездессе, бұл жай ғана чемпиондық матч болмайды.
Бұл соңғы он жылда Еуропада ең дұрыс құрылған екі футбол жүйесінің тартысы болады.Бірақ әлем чемпионатының ең ғажап жері – дәл осы жерде.
Барлық болжам қате шығуы мүмкін.
Ертең Марокко Францияны жеңіп кетуі ықтимал.
Норвегия Англияны тағы бір рет таңғалдыруы мүмкін.
Өйткені әлем чемпионаты бізге жыл сайын бір нәрсені еске салады.
Футболда ең қауіпті қарсылас – өз күшіне шектен тыс сеніп кеткен команда.Аргентинаның да амбиция түсінікті. Кубокқа ие болу. Бұл жолда командалық және төрешілік ойын көрсетіп келеді...