ТУҒАН ЖЕРГЕ ТУЫҢ ТІК
Қаратаудың етегін ен жайлаған елдің еншісіне жаратылған тұмса табиғат өзіне қалтқысыз ықыласы ауған перзенттеріне ерекше пейілді. Соның дәлелі, Құттықожа елді мекені аумағында бір ғасыр бұрын егіліп, жапырағын жайқалтқан алма бауына ауыл азаматтары әркез бас-көз болып келді. Заманына қарай нарық заңы кесе- көлденеңдеп, мемлекеттің назарынан тыс қалып, әлеуетті қожайынның қамқорлығына мұқтаждық тілсіз табиғаттың да тағдырына телінген сын сәтте аталған аумақ шынайы егесін тауып, маңдайы ашылатын күн туды. Бұған дейін жасыл желекке жергілікті халық өздерінше егелік етіп, сырттан келген ешкімге билетпейміз деп қарауылдап келген киелі орынды өз ауданымыздың азаматы Ержан Жаңабекұлы толықтай меншігіне алып, заманауи үлгіде жабдықтап, үлкен-кіші демалатын мәдени нысанға айналдырудың қам-қарекетіне кірісіп кеткені кеше еді, енді міне, ойдағы мақсаттың орайымен жүзеге асқанына куә болдық.
Астана күні мерекесі аясында Құттықожаның баурайындағы «Елнұр бағы» демалыс орны ел игілігіне пайдалануға берілді. Екі гектардай аумақты тұтас қамқорлыққа алған кәсіпкердің тынығу кешенінің архитектуралық ансамблін айшықтауда бабалар мұрасының мұртын бұзбай, дәстүр үндестігін үйлесімді үкілеуімен айналада жаймашуақ аура салтанат құрып, төрт құбыласы тең табиғи бояуы тамылжып тұр. Бұл жерге келушілер табиғат аясында тынығумен қатар жазғы бассейнде шомылады. Бақтың ортасынан ойып орын алған ересектер бассейнінен бөлек дәл осындай, бірақ көлемі шағындау балаларға арналған жасанды жүзу ваннасы бүлдіршіндердің шат күлкісіне кенелген. Жасыл бақ көмкерген ағаш сәкілерде отбасыңызбен сән түзеп отырып шай ішіп, кәуап жеп, басқа да қалаған асыңызға тапсырыс бере аласыз. Арнайы туған күндер мен мерекелік кештерді өткізуге де жағдай жасалған.
Астана күні аясында атаулы нысанның ашылу салтанаты өтіп, барша тілектес ағайын осы жерде бас түйістірді. Шараны ашқан
аудан әкімі орынбасары Бектас Балғабайұлы көңілдегі көрікті ойын іркіп қалмады:
– Құттықожа ауылында аудан тұрғындары игілігіне демалыс орны ашылып жатыр. Бұл орын әсіресе жастардың спортпен
шұғылдануына, жаз мезгілінде уақытты тиімді пайдалануына мұмкіндік береді. Бұдан бөлек туризм саласын дамытуға жол ашады.
Мемлекет басшысы «Шынайы патриот туған жерінің гүлденуіне өз үлесін қосады» деп атап өткен болатын. Осы сөзіміздің дәлелі, ауданымызда 27 кәсіпкер 200 млн теңгенің үстінде түрлі жобаға жан бітірді. Соның бірі – Ержан бауырымыз 100 миллионнан асатын
жеке қаражатына туған жерге инвестиция құйып, халық өміріне аса қажетті әлеуметтік кешенді іске қосып отыр. Бұл арқылы елдің әлеуметтік мәдени өмірінің өркендеуіне үлес қосумен бірге он бес адамды еңбекпен қамтып, жұмыссыздықты азайтуға да азаматтық қолұшын созды. Осындай азаматтардың арқасынде ел көркейеді, қоғам көшін алға түзейді. Сондықтан еңбектерінің жемісін көрсін дейміз – деді.
Одан әрі аудандық ардагерлер кеңесінің төрағасы Өмірсерік Тақырбасов, кәсіпкер, аудандық мәслихат депутаты Әлібек Нәлібаев сөз алып, жаңа кәсіптің қадамы оң болуына тілектестіктерін жеткізді. «Алып – анадан» демекші, осындай перзенттер тәрбиелеп, отбасылық кәсіптің тыныс-тіршілігіне тірек болып, ақ батасын беріп отырған ардагер-ұстаз-ана Әшіркүл Манапқызы да осы күні көптің алғысына кенелді.
Келесі кезекте көп алдында ағынан жарыла ақ тілегін арнаған көп жылдар ауданның бас имамы болған қадірменді ақсақал Садулла Омаровтың лебізі жүректерді толқытты:
«Әрбір ізгі істі Алланың атымен бастайтынымыз анық. Жаратушы ием дүниені жылағанға емес, еңбек етіп шыдағанға береді. Бақты да көтере алмай құлағанға емес, жоқтан бар жасап, құрағанға береді. Жастайынан қалып еңбек етіп, іс қылып, осындай дәрежеге жеткен
балаларымның қадамы оң болсын. Аллам осы жердің жемісін сіздерге берекелі етсін» деген
тілегін арнады. Ұлағатты ұстаз айтқан сөздің тереңінде мынадай тәмсіл жатыр. Бұл жөнінде отанасы Әшіркүл Манапқызымен сырласқаным бар еді. Жары Жаңабек он саусағынан өнері тамған жігіт еді. Тоқсан үшінші жылы орталықтағы жалғыз орыс мектебінде бірінші рет бастауыш қазақ сыныбын ашқан Әшіркүлдің кабинетін түгелдей жасақтап беруде Жаңабектен ешнәрсе артылмаған. Тағдырдың жазуына не амал, жан-жарының өмірі тым қысқа болды. Қырық жасында өмірден озып кете барды. Ол кезде тұңғыштары Ержан сегізіншіде оқиды. Кенже егіздері – бес жаста. Бес баламен қалған Әшіркүлдің осы балапандарын қалай өсіріп-жетілдіргенін көрші тұрғандықтан жақсы білетін Садулла ұстаздың көңілі толқып тұрған себебі сол.
Әшіркүл жалғыз тәрбиелеп жетілдірген бес ұл-қыздың барлығын бірдей оқытты. Үш ұлы газ технологиясы бойынша өндіріс маманы. Бір ұлы дәрігер. Келіндері де келген топырағына сай еңбекқор болып кезікті.
Ауданда газдандыру басталған уақытта екі жеңді түрініп, тірлікке кіріскен ағайындылар бір-біріне тірек болып, тың кәсіпті аяққа нық тұрғызды. «Бақ қайда барасың? Ынтымаққа!» дегендей, елге ең қажет кәсіптің қыр-сырына қанық, адал терің тамып, қажымай-талмай еңбек ете берсең табыстан де кенде болмайсың. Бәрінің бас қосып, маңдай термен тапқанын ортақ қазанға салып, жауапкершілікке үлкен
міндет алып, баянды бизнесті қолға алғанына қалай сүйсінбессің?
«Туған жерге туың тік» деген сөзде үлкен мән бар. Жасынан бағбандықты кәсіп қылған Ержанның нағашы атасы Манап
Пірімбетовтің өзі бастауыш сыныбы мұғалімі болғанымен кезінде «1 май» совхозының «Мичурині» болған кісі еді. «Жігіттің жақсысы
– нағашыдан» дейді, атасының ауылында жиі болып, қадір-қасиетін бойға дарытқан немере осы істі жалғастырып жатса жарасымды емес
пе? Бұл жөнінде кәсіп иесі Ержан Қонысов былай дейді: «Табиғатты тұтыну аз, тұтқа да бола білуіміз керек. Бауды жекеге алып, бизнес
ашып, пайда табу бір бөлек, туған жеріміздің тегін сыйына терең жанашырлықпен қарап, кәсіби ғана емес, ғылыми негізде жоба түзіп
отырмыз. Бұл бағытта маған өмірлік серігім Гүлшаттың көмегі көп. Ол экология саласы бойынша ғылым кандидаты. Он алты кітаптың
авторы.
Жақында ғана «Қалдықтарды қайта өңдеудің тиімді әдістері мен құрылғылары» деген кітабы жарық көрді. Осындай ізденістерін туған жеріміздің табиғатын игілікті кәдеге асыруға жұмсап, келісе тірлік қылсақ, кәсібіміздің де маңдайы ашылып, ісіміз оңынан қадам баса береріне сеніміміз мол» дейді ол.
Баян ҮСЕЙІНОВА
