Әжем айтқан ертегі
Жаңақорған аудандық балалар кітапханасы бүлдіршіндерге арналған игі жобаларды жүйелі түрде ұйымдастырып келеді. Сондай іс-шараның бірі – «Әжем айтқан ертегі» жобасы аясында өткізілген «Әжем айтқан ертегі – ізгілікті шертеді» атты ерекше ертегі-пати өтті.
Бұл жолғы ертегі кеші Жаңақорған ауданындағы «Айгөйлек» балабақшасында өтті. Іс-шараның басты мақсаты – балаларды ертегілер әлеміне жетелеп, олардың мазмұнын түсіне білуге, кейіпкерлерге мінездеме бере алуға, ойлау мен сөйлеу қабілеттерін дамытуға бағытталды.
Кеш барысында кітапханашы Мира Базарбайқызы балалармен жылы жүздесіп, кітапхана қорынан арнайы таңдап әкелген қызықты ертегі кітаптарын таныстырды. Ол «Мұрагер», «Ара мен Шегітке», «Шұбар тауық» сынды халық ертегілерін мәнерлеп оқып берді. Балалар ертегіні қызыға таңданып, тыңдап, әр кейіпкердің қылығына бірге күліп, бірге мұңайып, кей тұста өз ойларын да қосып отырды. Кеш тек ертегі тыңдаумен ғана шектелмеді. Балалардың белсенділігін арттыру мақсатында «Ойлан тап», «Жұмбақты шеш» секілді қызықты ойындар ұйымдастырылды. Әр жұмбақтан кейін балалар жарыса жауап беріп, ертегі кейіпкерлері туралы ойларын ашық айтып отырды.
Сондай-ақ, «Бұл қандай кейіпкер?» ойыны барысында балалар ертегіден алынған кейіпкерлердің суреттерін құрастырып, олардың кім екенін табуға тырысты. Ал мұндай іс-шаралар баланың кітапқа деген қызығушылығын арттырып, қиялын ұштайтын рухани бастама. Осындай тәрбиелік мәні зор шаралар балалардың бойына мейірімділік пен ізгілік дәнін себеді. Ертегі тыңдаған бала – ойлы бала. Ал ойлы бала – ертең елдің қамын ойлайтын тұлғаға айналары сөзсіз. Дәл осы сияқты тәрбиелік мәні зор шаралар алдағы уақытта да жалғасын тапса бүлдіршіндер ертегідей өмірдің жақсы тұстарын көбірек танитыны анық.
Динара ҮСЕНОВА
