«ЖЫЛ ҮЗДІГІ-2024»: МАМАНДАРҒА ҚҰРМЕТ
Еңбек еткеннің еңсесі биік, абыройы асқақ. Аудан бойынша жыл көлемінде өз саласында биік жетістіктерді иеленген тұлғалар «Жыл үздіктері» деп танылып, салтанатты шарада марапаттады.
Жыл қорытындысына арналған салтанатты кеште аудан басшысы Мажит Самитұлы аудан халқын Жаңа жыл мерекесімен құттықтап, ауданда 2024 жылы атқарылған жұмыстарға тоқталды.
– Баршаңызды келе жатқан Жаңа жылмен шын жүректен құттықтаймын! Жыл бедерінде берекелі бастамалар сәтті жүзеге асып, тұрғындарымыздың тұрмыс-тіршілігі түзелді. Жыл басында аудан бюджеті 16,1 млрд теңге болып бекітілсе, қазіргі таңда 20,4 млрд теңгеге жетті. Өткен жылмен салыстырғанда 7 млрд теңгеге ұлғайды. Президентіміздің, Үкіметтің, аймақ басшысының қолдауымен Жаңақорған кенті Маи бекетінен 300 орындық, Байкенже ауылынан 150 орындық мектептер, Жаңақорған кентінен 200 орындық Оқушылар үйі мен 50 орындық Өнер мектебі, балаларға оңалту ем-шараларын жүргізетiн «Қамқорлық» оңалту орталығы, Төменарық ауылынан жаңа дәрігерлік амбулатория мен 15 төсекке арналған ауылдық аурухана ашылып, аймақ басшысының қатысуымен пайдалануға берілді.
Ауданымыз мал шаруашылығы саласында жоғары жетістіктерге жеткені үшін «Озат аудан» номинациясымен марапатталды. Қол жеткізген жетістігіміз – туған жеріне жанашыр әрбір жаңақорғандықтың еселі еңбегінің жемісі деп білемін. Дендеріңізге саулық, отбастарыңызға амандық тілеймін, – деді аудан басшысы.
Мерекелік іс-шарада ауданның дамуына үлес қосып жүрген бірқатар азаматтар Қазақстан Республикасы Ауыл шаруашылығы министрлігінің, Қызылорда облысының «Құрмет» грамоталарымен, Қазақстан Республикасы мәслихаттарына 30 жыл мерекелік медалімен және облыс, аудан әкімінің Алғыс хаттарымен марапатталды. Сондай-ақ, Жаңақорған ауданының «Құрметті азаматы» төсбелгісі Қамбарбек Мүбараковқа, Жорабек Нұрымбетовке, Өмірзақ Әметұлына, Сәулебек Ысқақовқа, Әбутәліп Бакировке, Серік Ибрагимовке табысталды.
Жыл қорытындысында нәтижелі жұмыс өрнегімен әріптестерінен көш ілгері көрінген бірқатар сала мамандары «Жыл үздігі» атанды. Тарқатып айтсақ, «Үздік бөлім басшысы» тұғырына Жаңақорған аудандық мәдениет және тілдерді дамыту бөлімінің басшысы Әбілқайыр Сыздықов, «Үздік ауыл әкімі» номинациясына Нұрқасым Сейтқасым лайық деп танылды. «Жыл жанашыры» «Нұрбол-И» шаруақожалығы иесі Изатулла Үсенов, «Жыл депутаты» аудандық мәслихат депутаты Серік Мырзабаев, «Әлеуметтік сала үздігі» номинациясымен аудандық жұмыспен қамту және әлеуметтік бағдарламалар бөлімінің маманы Нұрәділ Беркімбаев, «Үздік білім саласы қызметкері» аталымына №286 мектептің ағылшын тілі пәні мұғалімі Анар Рүстемова, «Үздік медицина қызметкері» номинаиясымен дәрігер-неонотолог Кенжебек Шәрбекұлы, «Үздік мәдениет қызметкері» Нұрғаным Шәметова, «Қаржы саласының үздігі» Лина Абдрахманова, «Үздік мемлекеттік қызметкер» номинациясына кент әкімінің орынбасары Жасұлан Бейсенбеков, «Үздік журналист» номинациясымен «Жаңақорған тынысы» газетінің тілшісі Мақпал Патенова, «Жыл еңбек адамы» Жарқынбек Әлібеков, «Үздік коммуналдық сала қызметкері» Нұржан Ахметов, «Жыл құрылысшысы» аталымына Данияр Досантаевтар ие болып, марапат тұғырынан көрінді.
Түрлі салада ауданымыздың дамуына үлес қосқан азаматтардың, еңбек адамдарының мерейі тасыған кеште қазақ эстрадасының жарық жұлдыздары Наркенже Серікбаева мен Айбек Қайбулла әннен шашу шашты.
Мақпал МАРҚАБАЙ
