1-қыркүйек еліміздің барлық мектептерінде алғашқы қоңырау соғылып, салтанатты жиындар өтті. Бұл күн ерекше тебіреніс пен толғанысқа толы. Ұстаздар мен оқушылар үшін сәтті күн. Мектеп табалдырығын алғаш аттаған өрендер үшін ұмытылмас сәт. Осындай мерейлі күні ҚР Премьер-Министрінің орынбасары Тамара Дүйсенова Астанада қаласындағы №101 орта мектептегі алғашқы қоңырау шарасына қатысып, білімпаз бүлдіршіндерге сәттілік тіледі.
Айта кетейік, білім ошағы Мемлекет басшысының тапсырмасы бойынша «Жайлы мектеп» ұлттық жобасы аясында биыл бой көтеріп, қолданысқа енгізіліпті. Есігін жаңа ашқан мектептің оқушылары, ұстаздары мен ата-аналары алдында сөз алған Тамара Дүйсенова білім күнімен құттықтады.
– Бізде Назарбаев зияткерлік мектептері, Білім инновация лицейлері, республикалық физика-математика мектептері секілді үздік білім ошақтары бар. Олардың оқушылары білім сапасының өте жоғары деңгейін көрсетіп, Қазақстанды дүние жүзіне танытуда. Әрине, еліміздің барша балалары сондай мектептерде оқуды арман ететін. Президент сіздердің армандарыңызды орындады деп айтсам болады. Алдағы жылдары мұндай мектептер барша қазақстандық балаларға қолжетімді болмақ. Сіздердің алдарыңызда жақсы оқып, еліміздің лайықты тұлғалары болу міндеті тұр, – деді Тамара Дүйсенова.
Иа, биыл алғашқы қоңырау елдегі 7859 мектепте соғылды. Онда жалпы саны 3,9 млн-нан аса бала білім алмақ, оның 352 мыңнан астамы білім ошақтары табалдырығын алғаш рет аттап отыр.