Өмірде жақсылыққа зәру, қиындықпен күн кешіп жатқан жандар аз емес. Олардың ауыр тағдыры естіген жанды бей-жай қалдырмасы белгілі. Әсіресе баспананың азабын тартып, үйден-үйге көшіп, пәтер жағалап күн кешіп жүрген жандар жайы көңілге қаяу салады. Осы орайда "AMANAT" партиясы Жаңақорған аудандық филиалы «Харекет» қайырымдылық қорымен бірлесе отырып, Жаңақорғандық тағы бір отбасыны баспаналы етті.
Әрбір адам үшін баспаналы болу – үлкен қуаныш. Байкенже ауылының тұрғыны Амансырым Жадыра Абдулшукуркызының арманы әкесі мен анасын баспаналы етіп, ел қатарлы жылы үйде уайымсыз күн кешуі болатын. Міне, сол арманына қол жеткізіп, Жаңақорған ауданынан баспаналы болып отыр. Әкесі Амансырым Абдулшукур екінші топ мүгедектігі болса, анасы Абуова Айнагүл – үшінші топ мүгедегі. Қыздары Жадыра өзінің үш баласымен қатар, ата-анасын қарап отырған жан. Отбасылық жағдайларына қарай Астана қаласында 1 бөлмелі пәтер жалдап тұрып келген. Енді, бұл отбасы өз үйлерінде еркін өмір сүретін болады.
«Қайырымдылық жасасаң, қайырын өзің көресің», – дейді қазақ. Осындай кеңпейілді жандардың арқасында барша қазақ баспаналы болады деп сенейік.