Кітап күні мерекеленді
Жаңақорғанда тұңғыш рет халықаралық балаларға арналған кітап күні аталып өтті. Бұл мерекенің шығу тарихына тоқталсақ,1956 жылдан бастап Халықаралық кеңестің шешімімен жыл сайын дат жазушысы Ганс Христиан Андерсеннің туған күніне орай аталып өтіледі. Көптеген елдерде балалар мен жасөспірімдер кітабы апталығы аясында әлемнің үздік кітаптарына арналған байқаулар, көрмелер, конференциялар мен фестивальдер өткізу дәстүрге айналған.
Руханиятта шекара болмайды. Үлгілі істі үкілеу үлкен мақсатқа жеткізеді. Мереке аясында балалар әдебиеті насихатталады. Оларға бұрыннан таныс болмай келген кітаптар жан-жақты танстырылып, дәріс де оқылады. Кітапқа қызықтыру арқылы жас өреннің руханият мәйегін байытып, туған елі мен жерін сүюге, ата-анасын сыйлауға, үлкенге құрмет көрсетуге, имандылыққа тәрбиелеу міндет. Осы бағытта А.Сопыбеков атындағы аудандық кітапхананың балалар бөлімінің ұйымдастыруымен «Шаңырақ» аллеясында «Адал адам» мәдени-тәрбие орталығы тұжырымдамасының «Әлем-ВООК» жобасы аясында 2 сәуір – Халықаралық балалар кітабы күніне орай «Кітап – адамзаттың жақын досы» атты кітаптар шеруіне арналған мерекелік шара өтті. Оқушыларды кітаптарды құрметтей білуге, кітапты ұқыпты ұстауға баулу, оқушылардың кітапқа деген сүйіспеншілігін, қызығушылығын арттыруға бағытталған танымдық шараға зиялы қауым өкілдері, кітапханашылар, жастар мен мектеп оқушылары қатысты.
Рухани жиынның тұсауын кескен аудан әкімінің орынбасары Бектас Нуридинов шараның маңыздылығына тоқталды.
– «Кітап ақылына ақы сұрамайтын ең құнды қазына» деген екен түркі жұртының ұлы ақыны, ойшыл Әлішер Науаи. Расында қай ғасырда да кітаптың алатын орны бөлек. Кітап оқу, оқығаныңнан ой қорыту кемелденуге көмектеседі. Қазіргі таңда қаншама технологиялар тұрмысымызды жақсартқанымен, бұлардың бәрі кітапты алмастыра алмасы анық. Оқыған адамның күні қашан да жарық. Кім-кімді де зейін-зеректілікке баулып, санадағы ой арпалысына сәулелі ақылмен араша тұрар кітап секілді жанашыр достың орны зор. Сондықтан әр бала кітаппен дос болғаны келешегіне алтын көпір салғанмен бірдей, – деді ол.
Шараның құрметті қонақтары Қазақстан Жазушылар одағының мүшесі, балалар ақыны Адырбек Сопыбековтің жары Шарипа анамыз бен балалар ақыны Оразбай Қосанов ағамызға жас оқырмандар құрмет-қошемет танытып, мереке айында жарқын лебіздерімен бөлісті. Балалар кітабы шеруінде жергілікті ақын, жазушы Адырбек Сопбековтің «Көңілді біздің күніміз» кітабы мен «Шешілген жұмбақ» топтамасы көш бастады. Балдырған бала жүрегіне әр өлеңі құйыла кететін ақ жүрек ақынның өлеңдері де жатқа оқылды. Керуен тізбегін кештің құрметті қонағы Оразбай Қосановтың «Танысайық төлдермен» және «Балаларға базарлық» кітабы жалғастырды. Осы саптан бүлдіршіндер сүйіп оқитын ең көп сұраныстағы балалар әдебиеті де тыс қалмады, Оның ішінде әлемнің классигі, атақты ертегіші Ганс Христиан Андерсеннің «Таңдаулы ертегілері», Астрид Линдгреннің «Ұзыншұлық Пипи» кітабы, ««Қазақ халық ертегілері», Алдар көсе мен Қожанасыр хикаялары, жергілікті қаламгер Байбота Қошым-Ноғайдың «Достық жоралғы» кітабы, Бердібек Соқпақбаевтың «Менің атым Қожа» кітабы, Даниэль Дефоның «Робинзон Крузо», Жюль Верннің «Он бес жаар капитан», Николай Носовтың «Дым білместің Айға сапары», Мұзафар Әлімбаевтың «Алақай балақай» кітабы шерудің мәнін кіргізді.
Шара барысында аудан кітапханалары бойынша «Ең үздік оқырман» деп сараланған бір топ жас оқырманға аудандық мәдениет және тілдерді дамыту бөлімі басшысы Әбілқайыр Сыздықовтың «Алғыс хаты» табысталды.
Рухани шараға жиналғандар «Зерек» негізгі орта мектебі мен «Дарын-Shcool» мектебінің оқушылары дайындаған концерттік бағдарламасын тамашалады. Тақырыптық әндер орындалып, жергілікті ақын-жазушылардың кітапқа арналған өлеңдерінен үзінділер оқылды. Солардың қатырында Айару Құрманқазы орныдаған «Кітап әлемі» әні, Сұлтанхан Нұрберген мен Альмира Нартайдың «Кел, досым, кітапханаға» әні жүрекке жетті.
ТҮЙІН: «Білім – кітапта. Қазіргі таңда балалардың көбісі компьютерде отырады. Сондықтан болашақта кітап оқығандар компьютерде отырғандарды басқарады». Президент Қасым-Жомарт Тоқаевтың жас өрендерге қарата айтқан осы тәмсілінен-ақ көп нәрсені аңғару қиын емес. Демек, технология дамыған заманда балалардың кітап оқудан алшақтамауы үшін арнайы мерекенің ұйымдастырылуының өзінде де үлкен мән-мағына жатқандай. М.А.Горький: «Кітапты сүйіңдер, ол өмірді нұрландырады!» деген екен. Кітап оқыңыз, жас өрен!
Мақпал МАРҚАБАЙ
