Сіздерді Жаңа 2024 жыл мерекесімен шын жүректен құттықтаймын!

Жаңа жыл – қай халықтың да аса зор қуанышпен асыға күтетін мерейлі мерекесі. Өткен жылдың қорытындысын жасап, атқарылған істі саралайтын кезең.Өткен жылға өкпе жоқ. 2023 жыл ауданымыз үшін табысты, берекелі де несібелі, ырысы мол жыл болды. Қос тойымыз қабат келіп, облысымыздың 85 және ауданымыздың 95 жылдығын ауқымды етіп атап өттік. 95 түрлі мәдени-спорттық іс-шаралар өтті. Мерейлі күндермен қатар, еліміздің өсіп-өркендеуіне үлестерін қосқан туған жердің азаматтарының белестерін атап өтіп, танымдық - рухани шаралар өткіздік.
Елдің ырыс-берекесі мен диқан қауымының еселі еңбектерінің арқасында ауылшаруашылығы саласын дамытуда «Үздік аудан» атансақ, «Үлгілі елді мекен» конкурсында «Үлгілі аудан орталығы» номинациясын иелендік.
Барлық макроэкономикалық көрсеткіштер бойынша жағымды оң динамикаға қол жеткіздік. Ауданымызда іргелі ғимараттар бой түзеді. Бір сөзбен айтқанда, 2023 жыл біздің ауданымыз үшін ауыз толтырып айтарлықтай табысты, жемісті, мерейлі жыл болды.
Қадірлі қауым!
Айта берсек, жасалынып жатқан жұмыстар өте көп. Бұның барлығы алдымен елдің несібесі, халықтың ниетінің, пейілінің кеңдігінің жемісі. Азаматтардың қызметінің, қазыналы қарияларымыздың ақ батасының арқасында керемет нәтижеге қол жеткіздік. Әрине, келер жылға да жүйелі жоспарлар құрып отырмыз, оларды ел игілігі жолында іске асыруға дайынбыз. Бұйырса, ел болып бірігіп, жұрт болып жұмылып жұмыс жасаймыз деген ойдамын.
Жаңа жыл еліміз үшін мол табыстар мен жетістіктерге толы жағымды жыл болғай. Әрбір шаңыраққа бейбіт өмір, тыныштық пен мол жақсылықтар ала келсін.