Балжанның бағы жанды
![](/uploads/posts/2023-09/medium/1695701816_balzhanny.jpg)
Қазалы ауданы әкімдігінің қолдауымен Қазалы ауданының мәдениет және спорт бөлімі, Қазалы ауданының қоғамдық даму бөлімі және Ғани Мұратбаев ауылдық округ әкімі аппараты мен мәдениет үйінің ұйымдастыруымен еңбек және тыл ардагері Базаркүл Сейітнесіпованың 85 жылдық мерейтойына арналған «Мен анамын бақыт тапқан еңбектен, бір қолыммен бесігімді тербеткен» атты облыстық жас аналар байқауы өткізілді. Аймақтың жас аналарының басын біріктірген байқауға жаңақорғандық келіндер де бақ сынады. Ауданның атынан сынға түскен Балжан Бауыржанқызы олжалы оралып, абыройымызды асырды.
Еңбек және тыл ардагері Базаркүл Сейітнесіпованың 85 жылдық мерейтойына арналған шара еңбеккер ананың өмір жолынан сыр шертетін прологпен ашылып, ұрпақтарының қатысуымен әзиз анаға сахнада құрмет көрсетілді. Қазалы аудан әкімінің орынбасары Дәурен Тілеумбетов сөз алып, саналы ғұмырын туған жердің өркендеуіне сарп еткен абзал ананы айтулы мерейтойымен құттықтап, аудан әкімінің құттықтауын жеткізді. Мерейтой иесіне арнайы сый-сияпат табыстады және барлық қатысушыларға сәттілік тіледі.
Облыстық байқауға Арал, Қазалы, Қармақшы, Жалағаш, Сырдария, Шиелі, Жаңақорған аудандарынан 20-40 жас аралығындағы 8 ана қатысып, бақ сынады. Жаңақорған аудандық қоғамдық даму бөлімінің жетекші маманы Жайна Жиенбаеваның жетекшілігімен жас ана Балжан Садуова қатысып, жүлделі 2-ші орын иеленіп, 40 мың теңге ақшалай сыйлыққа ие болды.
– Ұлттық құндылықтар – халқымыздың басты байлығы. Халқымыздың салт-дәстүрі мен әдет-ғұрпын насихаттау мақсатын негізге алған байқау өте жақсы өтті. Қазіргі қоғамда нағыз қазақ анасының бейнесін қалыптастыру, қазақ қыздарына ұлт құндылықтарын дәріптеу арқылы біз өз құндылықтарымызды өркендетуге үлес қоса алатынымызды көрсетуге тырыстық. Әділ қазылар алқасы ІІ орынға лайық деп тапқан екен, қуаныштымын, – дейді байқауға қатысқан жас ана.
Үш кезеңнен тұратын сайыстың алғашқы таныстыру бөлімінде қатысушылар өзі мен отбасы туралы бейнекөрсетілім дайындаса, екінші кезеңде бесік жырын төгілдірді. Келесі кезеңде отбасы құндылықтарын насихаттауға байланысты 5-7 минут көлемінде сахналық көрініс қойып, жиналған қауымға рухани ләззат сыйлады.
Балжан қазір аудандық жұмыспен қамту және әлеуметтік бағдарламалар бөлімінде іс жүргізуші болып еңбек етеді. Кент орталығында тұратын Жүсекеевтер әулетінің ибалы келіні. Ата-ененің қасы-қабағына қарап, қара шаңырақтың түтінін түтетіп отырған жан. Жары Әлихан екеуі екі ұл, бір қыз тәрбиелеуде.
Міне, «Бір қолымен – бесікті, бір қолымен – әлемді тербеткен» аналар осындай ибалылық пен инабаттылықты бойына жиып, аяулы жар, асыл ана, сүйікті келін атанып отырса, қандай жарасымды. Бұл байқау Балжанның бағын ашып, тұла бойына біткен дарынын жарқырай көрсетті.
Жарайсың, Балжан!
Әсел Рзаева