Бизнес-омбудсмен мемлекетке 42500 теңге төлеуді жалғастыруды ұсынды

Қазақстан кәсіпкерлерінің құқықтарын қорғау жөніндегі уәкіл Рустам Жүрсінов мемлекетке карантин жағдайында өз қызметін толық көлемде жаңарта алмайтын кәсіпорындардың қызметкерлеріне 42500 теңге көлемінде жәрдемақы төлеуді жалғастыруды ұсынды, деп хабарлайды Stan.kz ақпарат агенттігіне сілтеме жасаған zhanaqorgan-tynysy.kz.

Жақында Алматыдағы бас еңбек инспекторы алматылықтарға жұмыс тоқтап тұрған кезде компания басшылығы қызметкерлерге 42500 теңге көлемінде ең төменгі жалақы төлеуден бас тартқан жағдайда шағым тсіруге ұсыныс жасады. Тәртіп бұзушыларға айыппұл салынады.
Айыппұл сомасы аз емес. Әкімшілік құқық бұзушылық туралы кодекстің 87-бабына сәйкес, шағын бизнес үшін ол 60 АЕК (166,68 мың теңге), орта — 100 АЕК (277,8 мың теңге), ірі — 150 АЕК (416,7 мың теңге) болады.
"Бұл жерде экономикалық шындыққа тоқталғым келеді. Қазіргі уақытта тыйым салынған да, өз қызметін қайта бастаған бизнес де апатты жағдайда тұр. Әкімдіктің әлеуметтік блогындағы шенеуніктерге жұмыс берушіге айыппұл салу оңай — бұл үшін көп ақылдың қажеті жоқ. Әрине, бизнестің тек жалақыға ғана емес, сонымен қатар тауарларды, материалдарды сатып алуға, қызметтерге тапсырыс беруіне де ақша қалмағандығы назарға алынбайды. Іс жүзінде, жеке лауазымды тұлғалар бизнесті "тығырыққа тіреу" үшін ақпараттарды белсенді түрде таратып жатыр", - деп жазды бизнес-омбудсмен Facebook-тегі парақшасында.
Рустам Жүрсінов қалыптасқан жағдайда мемлекеттік қызметкерлерді репрессивті құралдарға назар аудармауға шақырды. Оның сөзінше, төтенше жағдай режимінің тоқтатылуына қарамастан, бизнес енді аяққа тұрып жатыр, ал қызметкерлерге жалақы төлеу үшін біраз уақыт жұмыс істеуі керек.
Бизнестің кейбір түрлерінің қызметіне әлі де тыйым салынғанын, олардың жұмыс істемейтінін және тиісінше өз қызметкерлеріне ақы төлеуге мүмкіндігі жоқ екенін ұмытпаған жөн.
"Мемлекетке 42,5 мың теңге төлеуді жалғастыруды, экономиканың ең көп зардап шеккен салаларында, ең болмағанда әлі де тыйым салынған немесе толықтай жұмыс істемеген салаларда (қоғамдық тамақтану нысандары сияқты) төлем жасауды ұсынамыз", - деп атап өтті Жүрсінов.
Ол Ресей Федерациясында осындай мәселелер қалай шешілетінін мысалға келтірді. Оның жазуынша, Ресейде банктер жалақы төлеу үшін пайызсыз несие береді.