Нұрбек Бекбау тренингті неге түнде өткізді?

Кеше журналист-блогер, медиа-тренер Нұрбек Бекбау «Жаңақорған тынысы» газетінің журналистеріне «4 секундтық шанс» тақырыбында семинар- тренинг өткізді. Ә-дегеннен әріптестерін үйіре кеткен медиа-тренер: «4-ақ секундтық шанс». 4 секунд. Не істеп үлгересің? Қанша сөз айта аласың? Ал журналист екенсің, қазіргі көрерменді не газет оқырманын осынша секундта өзіңе қаратып үлгеруің керек. 4 ары кетсе 5 секунд... Осы санаулы секундтарда елең еткізсең, көреді. Әсер ете алмасаң, басқа арнаға немесе басқа сайтқа ауыстыра салады. Енді, назарын жаулап алу үшін не істеу керек?», деген сауалмен бастаған Нұрбек Бекбау журналист үшін 4 секундтың маңызын 40 минут бойына қызық тәсілдермен түсіндірді.
Мақала тақырыбын айқайлатып қою, барынша қысқа әрі ұғынықты тақырып табу. Мақаланы қалыптасқан жағдайдан бастап, хронологиялық ақпармен байланыстыра жазу жайын сөз етті. Ең бастысы – сараптамадан бөлек, әрбір журналист креативті көзқараста болып, алабөтен ойланудың артықшылығын айтып берді. Оған қоса, ақпарат ағынының толастамай тұрған қазіргі шағында ақпарат берудің жедел әрі тартымды түрлерін көрсетіп, оны қалай іске асыруды ортаға салды. Медиа-тренер көбіне жаңа медианың мүмкіндіктерін, оның аудиториясын қалай ауқымды етуді және оқырман сұранысын қалай жылдам анықтауға болатынын көрсетті.
Осылайша, кешкі сағат жеті де басталған тренинг дала тас қараңғы болып, аспанда жұлдыздар жарқыраған уақытта аяқталды. Ұжым атынан аудандық басылымның бас редакторы Нұрлат Байгенже Нұрбек Бекбауға алғысын білдіріп, уақыт тауып, тәжірибесімен бөліскеніне ризашылығын білдірді.

Әбдісамат ӘБДІШ