Қазақстандық спортшылар қоян-қолтық ұрыстан Еуропа чемпионатының жүлдегерлері атанды, деп хабарлайды «SPORTINFORM» САА. 

Минскіде өткен қоян-қолтық ұрыстан IV ашық чемпионатта 26 елден келген 170 спортшы жүлделі орындарға таласты. Еуропалықтармен қатар АҚШ, Канада, Иран, Қазақстан, Өзбекстан, Тәжікстан командалары да қатысты. Жарыс қожайыны Беларусь жекпе-жек шеберлері екі құраманы (әр салмақ санатында - екі спортшыдан) таныстырды, ал басқа елдер бір-бір құрамамен келген. 

Қазақстан 17 қатысушыны ұсынған болатын (оның 9 - ер, 8 - әйел). Чемпионатта Қазбек Сағын (55 келі) мен Данияр Үстембаев (90 келі) жоғары нәтиже көрсетіп, жеңіс тұғырына көтерілді. 

Жалпы, Қазақстан құрамасы 4 медаль иеленіп қайтты, оның екеуі - алтын, екеуі - Қымбат Ахмет пен Дәулет Имаханов еншілеген қола.