Балғын балуандардың бәсекесі

Төменарық ауылының спорт кешенінде спорт жанашыры, Төменарық ауылдық округінің рухани-мәдени дамуына үлес қосқан Құдияров Өскен Іскендірұлын еске алуға арналған еркін күрестен жасөспірімдер арасындағы аудандық ашық турнирі өткізілді.

Жарыстың ашылу салтанатында аудандық дене тәрбиесі, спорт және туризм бөлімінің басшысы Рахымжанов Махмут Секентайұлы, Төменарық ауылдық округінің әкімі Аймбетов Бахытжан Нәбиханұлы, аудандық №7 спорт мектебінің директоры Сламхан Боранбаев және туыстары қатысып, қатысушыларға сәттілік тілей отырып, көк туымызды желбіретіп, әлем, олимпиада чемпионы атанып, талай шыңды бағындыра берулеріне тілектестігін білдірді.Жарысқа Қызылорда облысы, Кентау қаласы, Шиелі, Арал, Жаңақорған аудандары мен кент және ауылдық округтерінен 14 команда 200-ге жуық спортшы қатысуда.

Құдиров Өскен Іскендірұлы 1962 жылы 4 наурызда Жаңақорған ауданында дүниеге келген. 1979 жылы "Горняк" орта мектебін Төменарық ауылында бітірген. 1980-82 жылдары Шымкент қаласында мед.техникумды, тіс технигі бойынша мамандығын алып, 1982-2020 жылдары Шиелі, Жаңақорған аудандық стамотология мекемелерінде қызмет атқарған. Болашақ ұрпақтың саналы тәрбиелеу үшін 2012-2013 жылдары жеке балабақшы, ауыл балдарының тұрақты түрде спортпен шұғылдануы үшін 2019-2021 жылдары спорт кешенін ашқан.