Қазақ кәсіпқой боксшысы Батыр Жүкембаев жартылай орта салмақта "WBC Continental Americas" чемпиондық атағын жеңіп алды. Отандасымыз Квебектегі бокс кешінің басты жекпе-жектерінің бірінде аргентиналық боксшы Джонатан Хосе Енизды жетінші раундта нокаутпен ұтты. 

27 жастағы отандасымыз спорттық мансабындағы екінші чемпиондық атағына қол жеткізді. Бұған дейін IBO International белдігін иеленген боксшымыз, бүгінгі жеңістен соң Boxrec рейтингісінде үздік отыздыққа кіретіні анық. Сондай-ақ кәсіпқой бокстағы 13-ші жеңісін тойлады. Оның 11-де уақытынан бұрын жеңіске жеткен. Батыр жекпе-жектерінің барлығын Канадада өткізіп келеді.