Халық босаңсып кетті – денсаулық министрі

Елімізде азаматтар арасында санитарлық талаптар сақталмаса, карантин режимі қайта енгізілуі мүмкін. Бұл туралы денсаулық сақтау министрі Алексей Цой айтты.
Оның айтуынша, жағдай тұрақты болғанымен, халық босаңсып кетті. Карантин талаптары жеңілдегеннен кейін, енгізілген шектеулерді бұзған фактілер 30,4%-тен 40,7%-ке дейін өскен. Өңірлерде карантин талаптарын бұзған азаматтар саны артқан.
«Медициналық маска тағу, арақашықтықты қадағалау азаматтар арасында сақталмай жатыр.  Бұл инфекция таралып, вирус жұқтырған адамдардың көбеюіне әкелуі мүмкін. Себебі бұл жағдайлар әлем елдерінде қайталануда», - деді министр.
Ол әкімдерге карантин режимін сақтауды қадағалауды және халыққа түсіндіру жұмыстарын жүргізуді тапсырды.