Мамандықтың жаманы жоқ
Жаһандану заманында бәсекеге қабілетті болудың көрсеткіші – білім деңгейімен өлшенеді. Сондықтан әлемдік білім кеңістігіне кірігіп, білім беру жүйесін халықаралық биікке көтеру – кезек күттірмейтін өзекті мәселе. Ал, мамандықты сұранысқа сай таңдай білу де заман талабы. Сондықтан, өскелең ұрпаққа ақыл-кеңесін айтып, жол сілтеп отыру аға буынның басты міндеті.
Осындай мақсатта №169 Н.Илялетдинов атындағы білім ошағында жоғары сынып оқушылардың қатысуымен «Кәсіп таңдау – болашақтың кепілі» тақырыбында кездесу ұйымдастырылды. Жиынға аудандық нотариаттың басшысы Әбушахма Әлайдаров, кәсіби медиатор Ақылбек Жәнібек, кент әкімдігінің бас маманы Алма Мамирова, агро-техникалық колледж директорының шығармашылық жөніндегі орынбасары Талғат Шарап пен кітапханашы Мира Жиенбаева қатысты. Сондай-ақ, полиция инспекторы Арыстанбек Төлешов пен аудандық Кірістер басқармасының бөлім басшысы Талғат Қалдыбаев қонақ ретінде қатысып, өмірлік тәжірибелерімен бөлісті.
Әр саланың өкілдері бас қосқан шараны мектеп директоры Аллаберген Ахметов ашып, кездесудің мақсатын түсіндірді. Қазақы би, ұлттық әндермен түрілген жиында оқушылар келген қонақтарға сұрақтарын жаудырды. Әр мамандықтың өз қызығы мен қиындығы қатар жүреді демекші, 8,9 және 10-сынып оқушылары әр саланың өкілдерінен қызметтік жолдағы жауапкершілік жүгінің маңыздылығын білуге тырысты.
– Бүгінгі кездеу мен үшін үлкен дәріс болды. Шығармашылыққа бейім болған соң, кітапхана ісі мен тілшілік тіршіліктің бір күнін білу мен үшін қызық болды. Осындай басқосулар жиі ұйымдастырылып тұрса дейміз, – дейді Дильназ.
Ерлан АБДРАСИЛОВ.
