Қорқыт ата атындағы Қызылорда университетінің Басқарма Төрағасы-Ректоры Бейбіткүл Кәрімова ҚР Ішкі Істер органдарының құрметті қызметкері, Облыстық Қоғамдық Кеңестің төралқа мүшесі Әмірбек Шаймағамбетов және «ЗАҢ» Медиа-корпорациясы» ЖШС президенті Досымбек Өтеғалиевпен кездесті.

Басқосуда бәсекеге қабілетті, құқықтық сауатты ұрпақ тәрбиелеудің маңыздылығы мен екіжақты ұсыныстар талқыланды.
«Жаңа Қазақстанның басты принципі - әділеттілік. Мемлекет басшысы Жолдауда да құқық қорғау институттарын күшейтуді тапсырған болатын. Сондықтан осы салаға қойылатын талапта күшейіп отыр. Бүгінде университетте 2 білім беру бағдарламасы (БББ) бойынша мамандар білім алады. Сондай-ақ, құқықтану кафедрасында біліктілік талаптарына сәйкес жаңа БББ дайындалып, реестрге енгізу жұмыстары жүргізілуде», - деді Бейбіткүл Сәрсемханқызы.


Кездесу барысында «ЗАҢ» медиа-корпорациясы ЖШС президенті Досымбек Өтеғалиев газеттен қосымша айдар ашып,  профессор-оқытушылар мен білім алушылардың материалдарын, зерттеулерін жариялауды ұсынды. Ал Әмірбек Шаймағамбетов детектив жанрының атасы Кемел Тоқаев туралы «Шытырман» кітабының тұсаукесерін оқу орнында өткізудің маңызыдылығын айтты.

Айта кетейік, Қорқыт ата атындағы Қызылорда университетінде «Құқықтану» кафедрасы 1992 жылы құрылған. Университетте білім алушылардың сұрақтары мен ұсыныстарын тыңдап, ой-пікір алмасуға мүмкіндік беретін Заң клиникасы жұмыс істейді. Бүгінде кафедрада 604 студент білім алуда.

                                                                                                            Қорқыт Ата атындағы Қызылорда
                                                                                                            университетінің медиа орталығы