Қоғамда жастардың білімге, кітап оқуға деген құмарлығының төмендігін жиі тілге тиек етіп жатады. Жөн-ақ. Еш қарсылығым жоқ. Тек сол телефонға деген құмарлықты жақсы жағынан пайдалануға, сол телефон арқылы білім алуға неге бейімдемеске...
Ғаламторды, ұялы телефонды бекерге уақыт өткізу үшін емес уақыттарын тиімді әрі пайдалы өткізуге де болады. Өйткені, қазіргі балаларды олардан тыю мүмкін емес. Өзім әке әрі ұстаз ретінде баламның құнұзаққа телефонға шұқшиып отыратыны жаныма қатты батты. Содан қызықты деген аудиокітаптарды тартып алып, кешқұрым баламды жаныма алып бірге тыңдауды әдетке айналдыра бастадым. Одан бөлек, ағылшын тілін қалай үйренуге болатынын да екеулеп қызықтап қарадық.
Міне, қазір жарты жылға жуықтады, баламмен күніне бір сағат көлемінде телефон арқылы кітап оқып, ағылшын тілін меңгертуге ықпал жасап жатырмын. Сол сияқты, сізде балаңызға телефонды тек ойын үшін емес, білім алуға септігін тигіссеңіз деген ойым бар.
Түсінгенім, әр нәрсеге белгілі бір уақытын белгілеу керек. Баланы бірден кітап оқуға үйретемін деп ұзақ уақытын жұмсамаңыз. Күніне 1 сағаттың өзі бала үшін жеткілікті.
Міне, оқу жылы да аяқталуға жақын, алда ұзақ демалыс жалғасады. Осы орайда ұл-қыздар бос уақыттарын қалай тиімді өткізеді деген сұрақ туындайды. Бірақ, қазір ғаламтордың дамыған заманы ғой. Әр баланың қолында бір-бір смартфон, планшеттен бар. Түртіп қалсаң іздеген дүниенің барлығы шыға келеді. Осы орайда  оқушыларға өздерінің ой-өрісін кеңейтіп кітап оқуына мүмкіндік жасаңыз. Бұл – оларға мектептен тыс білім алуға жақсы мүмкіндік.
Оқушылар дене бітімі, зеректік, сезімталдық қасиеттері мен қабілеттері жағынан бір-бірінен өзгеше болып келеді. Бір оқушының өз еркімен және жылдам үйренген бір дәрісі басқа оқушыға қиынға соғуы мүмкін. Басқа оқушы тез шаршауы мүмкін немесе сол мезетте сабақ оқуға ынтасы болмауы мүмкін.
Осы себепті  әр бала уақытты өзіне ыңғайлап тағайындап алғаны абзал.
Бір сағат сабақ оқығаннан кейін 5-10 минуттық үзіліс жасау пайдалы болады. Осы арқылы бір сағаттық сабақтың соңындағы тараған зейін мен өнімділік қайта қалпына келеді. Сабақ оқу үшін қажетті күш-қуаттың қалыптасуы үшін ойын-сауық пен спортқа да уақыт бөлу керек. Сонымен қатар, әлемдік ғалымдар мына әдісті қолданады.
Айталық, кассиль тәсілі – баланы кітапқа қызықтырудың танымал әдісі. Бұл оқи алатын, бірақ кітап оқуға құлқы жоқ балаларға арналған. Кассиль тәсілі бойынша, ата-ана кітапты баламен бірге оқып бастап, қызық жеріне келгенде үй шаруасын сылтауратып баланы жалғыз қалдырып кетуі керек.
Кітаптың қызығын көрген бала оны соңына дейін оқып бітіретіні анық. Тағы бір мысал келтіре кетейін, балаға бір жолын, өзіңіз бір жолын оқып та қызықтыруға болады. Мұндайда бала үлкендерге көмектесіп жатқанын, өзінің маңызы бар екенін сезеді. Бала тәрбиелеп отырған әрбір ата-ана баласының өз бетімен кітап оқуға үйрету арқылы болашаққа бағдар жол салатыны анық.
Еркебұлан ТӨЛЕУБЕКОВ